ក្មេងប្រុសអាយុ ៨ឆ្នាំម្នាក់ មកពីប្រទេសហ្គាតេម៉ាឡា (Guatemala) បានស្លាប់នៅកន្លែងឃុំឃាំងរបស់រដ្ឋាភិបាលអាមេរិច ស្ថិតនៅក្បែរព្រំដែន។ នេះបើតាមការបញ្ជាក់របស់អាជ្ញាធរអន្តោប្រវេសន៍។
នេះគឺជាការស្លាប់របស់កុមារទី ២ហើយ ក្នុងរយៈពេលមួយខែ ខណៈដែលកុមារអន្តោប្រវេសន៍រូបនោះត្រូវបានឃុំខ្លួន បន្ទាប់ពីធ្វើការឆ្លងដែនចូលមកព្រំដែនអាមេរិច-មិចស៊ិចកូ។
កាលពីថ្មីៗកន្លងទៅនេះ ក៏មានកុមារីម្នាក់ផងដែរ ដែលមានអាយុ ៧ឆ្នាំ បានស្លាប់ បន្ទាប់ពីនាងត្រូវគេឃុំខ្លួន តែប៉ុន្មានម៉ោងប៉ុណ្ណោះ។
មន្ត្រីអាមេរិចបានបញ្ជាក់ថា កុមារីនោះបានព្យាយាមឆ្លងព្រំដែនអាមេរិចមិចស៊ិចកូ ដោយខុសច្បាប់ ជាមួយនឹងក្រុមគ្រួសាររបស់នាង។
កុមារីជនជាតិហ្គាតេម៉ាឡាដដែលនោះ ដែលត្រូវអាជ្ញាធរស្គាល់ឈ្មោះថា Jakelin Caal បានស្លាប់ដោយសារបញ្ហាថ្លើម។ ប៉ុន្តែកាសែតអាមេរិច Washington Post បានចុះផ្សាយថា កុមារីនោះស្លាប់ដោយសារការខ្សោះជាតិទឹក និងតក់ស្លុត។ កាសែតបានដកស្រង់មន្ត្រីព្រំដែន ដោយបញ្ជាក់ថា នាងមិនបានហូប ឬផឹកទឹកអស់រយៈពេល ច្រើនថ្ងៃ។
សូមបញ្ជាក់ថា ជនអន្តោប្រវេសន៍រាប់ពាន់នាក់បានធ្វើដំណើរពីអាមេរិចកណ្តាលមកព្រំដែនអាមេរិច ដើម្បីស្វែងរកជីវិតថ្មី។ ពួកគេតាំងនោះនិយាយថា ពួកគេភៀសខ្លួនពីការធ្វើទុក្ខបុកម្នេញភាពក្រីក្រី និងអំពើហឹង្សានៅប្រទេសកំណើតរបស់ពួកគេ រួមមានប្រទេសហ្គាតេម៉ាឡា ហុងឌូរ៉ាស និង អែលសាល់វ៉ាឌ័រ៕
ប្រភព៖ BBC