ភ្នំពេញ ៖ ក្រសួងសាធារណការ និងដឹកជញ្ជូន និងក្រុមហ៊ុនទីប្រឹក្សាបច្ចេកទេសDohwa Engineering Co., Ltd ចុះហត្ថលេខាលើកិច្ចសន្យាសេវាទីប្រឹក្សានៃគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ ដែលមានចំនួនទឹកប្រាក់ប្រមាណជាង ៦៣ លានដុល្លារសហរដ្ឋអាមេរិក នៅថ្ងៃពុធ ទី២៦ ខែធ្នូ ឆ្នាំ២០១៨ នៅទីស្ដីការ ក្រសួងសាធារណការ និងដឹកជញ្ជូន។
សូមជម្រាបជូនថា៖ រាជរដ្ឋាភិបាលកម្ពុជាបានទទួលឥណទានពីធនាគារនីហរ័ណ អាហរ័ណកូរ៉េ សម្រាប់ គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ ដែលមានចំនួនទឹកប្រាក់ប្រមាណជាង ៦៣ លានដុល្លារសហរដ្ឋអាមេរិក ដើម្បីសាងសង់ស្ថានីយប្រព្រឹត្តកម្មទឹកកខ្វក់ដែលមានសមត្ថភាពចម្រោះទឹក បាន៧៦០០ម៉ែត្រគីបក្នុងមួយថ្ងៃ និងសាងសង់ស្ថានីយបូមទឹកចំនួន១០ទីតាំង ដែលមានសមត្ថភាពអាចបូម បាន២៩ ៩៥២ ម៉ែត្រគីប ក្នុងមួយថ្ងៃ សាងសង់បណ្តាញលូ ស្តារស្ទឹងប្រវែង១៦,៣គីឡូម៉ែត្រ និងស្តារ ស្ថានីយបូមទឹកដែលមានស្រាប់ផងដែរ។
លោក ទេសរដ្ឋមន្ត្រី ស៊ុន ចាន់ថុល ដែល ជាអធិបតី បានគូសបញ្ជាក់ថា៖ ការចុះអនុស្សរណនៃការយោគយល់នេះធ្វើឡើងក្នុងគោល បំណងធ្វើឱ្យប្រសើរឡើងនូវស្ថានភាពសុខុមាលភាព និងអនាម័យប្រជាពលរដ្ឋ តាមរយៈការសាងសង់ ស្ថានីយប្រព្រឹត្តកម្មដែលមានសមត្ថភាពគ្រប់គ្រាន់ក្នុងការច្រោះទឹកកខ្វក់ពីតាមផ្ទះប្រជាពលរដ្ឋ លើកកម្ពស់បរិស្ថានដោយការបង្កើតប្រព័ន្ធបណ្តាញលូ និងការតភ្ជាប់បណ្តាញលូពីផ្ទះប្រជាពលរដ្ឋមកកាន់ ស្ថានីយប្រព្រឹត្តកម្ម ព្រមទាំងអាចការពារទឹកជំនន់ផងដែរ៕ ដោយ ៖ បញ្ញាស័ក្តិ
