ប្រធានាធិបតីអាមេរិច ដូណាល់ ត្រាំ និងស្ត្រីទីមួយ Melania Trump បានធ្វើដំណើរទៅកាន់ប្រទេសអ៊ីរ៉ាក់ ដើម្បីសួរសុខទុក្ខទាហ៊ានអាមេរិចដែលកំពុងឈរជើងនៅទីនោះ ក្នុងកំឡុងពេលបុណ្យណូអែល។
លោកត្រាំ និងប្រពន្ធខ្លួន បានទៅអ៊ីរ៉ាក់ដើម្បីអរគុណដល់ទាហ៊ានទាំងអស់សម្រាប់កិច្ចការ ភាពជោគជ័យ និងការលះបង់របស់ពួកគេ។
លោកត្រាំក៏បានប្រកាសផងដែរថា អាមេរិចមិនមានគំរោងដកទ័ពចេញពីប្រទេសអ៊ីរ៉ាក់ទេ។
ការធ្វើដំណើរទស្សនៈកិច្ចទៅសួរសុខទុក្ខទាហ៊ាននៅអ៊ីរ៉ាក់ កើតឡើងតែប៉ុន្មានថ្ងៃប៉ុណ្ណោះ បន្ទាប់ពីរដ្ឋមន្ត្រីការពារជាតិអាមេរិច Jim Mattis បានលាលែងពីដំណែង ដោយសារតែមានគោលនយោបាយមិនស៊ីគ្នា បន្ទាប់ពីលោក ត្រាំបានប្រកាសដកទ័ពចេញពីប្រទេសស៊ីរី។
សូមបញ្ជាក់ថា បច្ចុប្បន្ន អាមេរិចមានទ័ពចំនួន ៥.០០០នាក់ដែលកំពុងឈរជើងក្នុងប្រទេសអ៊ីរ៉ាក់។ វត្តមានទ័ពអាមេរិចដ៏ច្រើននេះគឺដើម្បីគាំទ្រដល់រដ្ឋាភិបាលអ៊ីរ៉ាក់ក្នុងការប្រយុទ្ធប្រឆាំង នឹងពួកភេរវករអ៊ីស្លាម IS ដែលនៅសេសសល់ក្នុងប្រទេសនេះ៕ សុភ័ក្ត្រ
ប្រភព៖ BBC
