ភ្នំពេញ ៖ ករណីស្លាប់ទាំងម្ដាយ និងកូនក្នុងផ្ទៃ ខណៈគាត់ឈឺពោះ ទៅសម្រាលកូននៅ មន្ទីរសម្រាក និងព្យាបាល ឡាំ ប៊ុនថន ដោយសាររង់ចាំគ្រូពេទ្យយូរពេក ផ្អើលដល់ លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បញ្ជាបានចាត់ឲ្យលោកវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ ចុះទៅស្រាវជ្រាវភ្លាមៗ។
ហេតុការណ៍នេះ បានកើតឡើងនៅវេលាម៉ោង១១ព្រឹក ថ្ងៃទី២៨ ខែធ្នូ ឆ្នាំ២០១៨នេះ ស្ថិតនៅទីតាំងគ្លីនីកតែម្តង តាមបណ្តោយផ្លូវជាតិលេខ៤ ភូមិជម្ពូវ័ន្ត សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
លោកសាស្ដ្រាចារ្យ ម៉ម ប៊ុនហេង បានអះអាងថា៖ ក្រោយពេលក្រសួង បានទទួលព័ត៌មាននេះរួចហើយ បានចាត់ឲ្យ ប្រធានមន្ទីរសុខាភិបាលរាជធានីភ្នំពេញ ចុះទៅស្រាវជ្រាវករណីនេះភ្លាមៗ ។ លោក ម៉ម ប៊ុនហេង ចូលរួមរំលែកមរណទុក្ខ ដ៏ក្រៀមក្រំជាមួយក្រុមគ្រួសារសពផងដែរ ។
ស្ត្រីរងគ្រោះឈ្មោះ យ៉េម មករា អាយុ៣៧ឆ្នាំ ជាកូនរបស់ក្រុមប្រឹក្សាសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។ ជនរងគ្រោះមានទីលំនៅភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ និងបច្ចុប្បន្នស្នាក់នៅភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ។ ស្ត្រីរងគ្រោះ បានឈឺពោះសម្រាលកូន នៅវេលាម៉ោង៦ព្រឹកថ្ងៃទី២៨ ខែធ្នូ ឆ្នាំ២០១៨ ក៏សម្រចដឹកទៅគ្លីនិក ឡាំ ប៊ុនថន ដែលមកដល់នៅម៉ោង៧ព្រឹក ហើយពេលមកដល់គ្លីនីក បានចរចាជាមួយខាងគ្លីនិក តម្លៃ៦២០ដុល្លារ។ នៅវេលាម៉ោង៨ព្រឹក ខាងគ្លីនិកដែលបានសម្របសម្រួល ខាងវះកាត់រួចហើយនោះ បែរជាមិនបានវះកាត់វិញ។
រហូតដល់ម៉ោង១១ព្រឹក ជនរងគ្រោះបានឈឺពោះកាន់តែខ្លាំង ហើយអស់កម្លាំងរហូតដល់សន្លប់បាត់ស្មារតី ហើយខាងគ្លីនិកថា មានអការធ្ងន់ធ្ងរ ក៏បញ្ជូនទៅសង្គ្រោះនៅមន្ទីរពេទ្យខ្មែរ-សូវៀត។ មកដល់មន្ទីរពេទ្យខ្មែរ-សូវៀត ស្រាប់តែពេទ្យប្រាប់ថា ជនរងគ្រោះបានស្លាប់បាត់ហើយ គឺទាំងម្តាយ និងកូន មិនដឹងថា ដាច់ខ្យល់តាំងពីពេលណាទេ ។
ពាក់ព័ន្ធករណីនេះ ខាងគ្លីនិក ឡាំ ប៊ុនថន បានបញ្ជាក់ការស្លាប់របស់ស្ត្រីរងគ្រោះ មានជំងឺម្យ៉ាង ដែលកើតឡើងភ្លាមៗ ហើយមានអការធ្ងន់ធ្ងរ ៕ ដោយ ៖ បញ្ញាស័ក្តិ