ខេត្តស្វាយរៀង ៖ យ៉ាងហោចណាស់ក៏មានកម្មករកម្មការិនីរោងចក្រចំនួន១៥នាក់ក្នុងចំណោម៦០នាក់បានរងរបួសស្រាលដោយសារអ្នកបើកបររថយន្តដឹកកម្មករកម្មការិនីរោងចក្របើកកៀកគ្នាទុកចន្លោះសុវត្ថិភាពមិនគ្រប់គ្រាន់ នៅពេលរថយន្តខាងមុខជាន់ហ្វ្រាំ រថយន្តដឹកកម្មករបានជ្រុលទៅបុកពីក្រោយដោយជាន់ហ្វ្រាំងមិនជាប់តែសំណាងល្អគ្មានគ្រោះថ្នាក់ដល់អាយុជីវិត។
ករណីគ្រោះថ្នាក់ខាងលើនេះបានកើតឡើងកាលពីវេលាម៉ោង៦និង៣០នាទីព្រឹកថ្ងៃទី ៣ ខែមករា ឆ្នាំ២០១៩នេះ ចន្លោះគីឡូម៉ែត្រ១៣៩/១៤០ ស្ថិតនៅលើផ្លូវជាតិលេខ១ស្ថិតនៅភូមិ ថ្នល់កែង ឃុំ កណ្ដៀងរាយ ស្រុកស្វាយទាប ខេត្តស្វាយរៀង។
យោងតាមសមត្ថកិច្ចបានអោយដឹងថា៖កណីគ្រោះថ្នាក់ចរាចរណ៍នេះបានកើតឡើងរវាងរថយន្ដដឹកសុីទែននិងរថយន្តដឹកកម្មករកម្មការិនីរោងចក្រនិងបង្កឡើងដោយរថយន្តម៉ាក ហ៊ីយ៉ាន់ដាយ ពណ៌ស ស្លាកលេខ ភ្នំពេញ 3D 4014 បើកបរដោយឈ្មោះ ខៀវ ហន ភេទប្រុស អាយុ២៥ ឆ្នាំ មុខរបរ បើកបរ សញ្ជាតិខ្មែរ ជនជាតិខ្មែរ រស់នៅភូមិ ថ្លុកព្រីង ឃុំ ពពែត ស្រុកស្វាយទាប ខេត្តស្វាយរៀង គ្មានរងរបួសនោះទេ(អ្នកបើកបរ) រថយន្ត បានធ្វើដំណើរក្នុងទិសដៅពីលិចទៅកើតស្របគ្នាលុះមកដល់ត្រង់ចំណុចកើតហេតុខាងលើក៏បានបុកគូទរថយន្តសុីទែនពីក្រោយ ។
ប្រភពបានបន្តទៀតថា៖ក្រោយជួបគ្រោះរថយន្តសុីទែនក៏ទៅមុខបាត់ ចំណែករថយន្តបង្កគឺនៅកន្លែងកើតហេតុ មានកម្មកររួមដំណើរ ចំនួន៦០នាក់ បណ្ដាលឱ្យរងរបួសចំនួន១៥នាក់ក្នុងនោះប្រុស០១នាក់ បច្ចុប្បន្នកំពុងសំរាកព្យាបាលរបួសនៅ មន្ទីរពេទ្យបង្អែកស្រុកស្វាយទាប (អ្នកទាំងអស់រងរបួសស្រាល) និងអ្នកបើកថ្នាំចំនួន៣២នាក់ ប្រុស ៥នាក់ អ្នកទាំង៣២នាក់នេះសុំបើកថ្នាំលេប ។
ចំពោះរថយន្តដឹកកម្មករបានរក្សាទុកនៅអធិការដ្ឋាននគរបាលស្រុកស្វាយទាប។ មូលហេតុ បើកបរកៀកគ្នាទុកចន្លោះសុវត្ថិភាពមិនគ្រប់គ្រាន់ (នៅពេលរថយន្តខាងមុខជាន់ហ្វ្រាំ រថយន្តពីក្រោយជាន់ហ្វ្រាំង មិនជាប់ក៏ទៅមុខបុកគូទរថយន្តខាងមុខតែម្តង) ៕ ដោយ ៖ វ៉ៃគោ
