ប្រធានាធិបតីរុស្សី វ្លាឌីមៀ ពូទីន (Vladimir Putin) កាលពីថ្ងៃច័ន្ទម្សិលមិញបានបញ្ហាឲ្យមានការដកកងទ័ពចេញពីប្រទេសស៊ីរី។ ការប្រកាសរបស់លោកបានធ្វើឡើងក្នុងកំឡុងដំណើរទស្សនៈកិច្ចទៅកាន់ប្រទេសស៊ីរីដែលញាំញីដោយសារសង្គ្រាមស៊ីវិល។
ក្នុងដំណើរទស្សនៈកិច្ច លោក ពូទីនបានជួបជាមួយនឹងប្រធានាធិបតីសស៊ីរី បាហ្សា អាល់អាសាត (Bashar al-Assad) នៅមូលដ្ឋានទ័ពអាកាសរបស់រុស្សី (Hmeimim) ក្នុងប្រទេសស៊ីរី។ នេះបើតាមសេចក្តីរាយការណ៏របស់ភ្នាក់ងារសារព៌តមានរដ្ឋរបស់រុស្សីឈ្មោះ Tass។
សារព៌តមាន ដដែលបានដកស្រង់សម្តីលោក ពូទីន ដូច្នេះថា “ក្នុងរយៈពេល ២ឆ្នាំមកនេះ កងកំលាំងរុស្សី រួមនឹងទាហ៊ានរបស់ស៊ីរីបានវាយកំទិចក្រុមភេរវកម្មអន្តរជាតិ ដែលមានគ្រោះថ្នាក់បំផុត”។
នេះមិនមែនជាលើកទី ១ទេដែល ប្រធានាធិបតី ពូទីន បានប្រកាសពីបំណងរបស់លោកក្នុងការដកកងទ័ពចេញពីប្រទេសស៊ីរី។ ទោះយ៉ាងណា លោកថ្លែងថា មូលដ្ឋានទ័ពរបស់រុស្សីចំនួនពីរកន្លែង គឺ Hmeimim និង Tartus នឹងនៅតែបន្តប្រតិបត្តិការបើទោះបីជាមានការដកទ័ពខ្លះ។
លោកពូទីន ថ្លែងនៅថ្ងៃច័ន្ទដូច្នេះថា “ប្រសិនក្រុមភេរវកម្មអើតក្បាលពួកគេមកម្តងទៀត ពួកយើងនឹងវាយប្រហារពួកគេដោយកងកំលាំងទាំងនោះ ដែលក្រុមនេះមិនធ្លាប់បានឃើញពីមុនមក”។
ការធ្វើដំណើរទស្សនៈកិច្ចរបស់លោក ពូទីនទៅកាន់ប្រទេសស៊ីរី កើតឡើងតែ ២ថ្ងៃប៉ុណ្ណោះក្រោយពេលទាហ៊ានរបស់ប្រទេសអ៊ឺរ៉ាក់បានប្រកាសនៅក្នុងសេចក្តីថ្លែងការណ៍ថា ពួកគេបានរំដោះប្រទេសទាំងស្រុងពីក្រុមភេរវករ ISIS និងបានកាន់កាប់មកវិញនូវព្រំដែនរវាងប្រទេសអ៊ឺរ៉ាក់ និងស៊ីរី៕ សុភ័ក្ត្រ