ខេត្តស្ទឹងត្រែង ៖ នគរបាលប្រឆាំងបទល្មើសគ្រឿងញៀន នៃស្នងការនគរបាលខេត្តស្ទឹងត្រែង បានការបង្ក្រាបករណីជួញដូរដោយខុសច្បាប់នូវសារធាតុញៀនមួយករណី ដោយចាប់បានបុរសជាជនសង្ស័យម្នាក់ ធ្វើសកម្មភាពជួញដូរគ្រឿងញៀននៅផ្ទះសំណាក់ មួយកន្លែង ក្នុងក្រុងស្ទឹងត្រែង។
តាមរបាយការណ៍ ស្តីពីលទ្ធផល នៃ កិច្ចប្រតិបត្តិការបង្ក្រាប ករណីជួញដូរដោយខុសច្បាប់នូវសារធាតុញៀន របស់ស្នងការរដ្ឋាននគរបាលខេត្តស្ទឹងត្រែង បានបង្ហាញថា នគរបាលប្រឆាំងបទល្មើសគ្រឿងញៀន ឃាត់ខ្លួនជនសង្ស័យឈ្មោះ រ័ត្ន សៀងហ៊ុន អាយុ ៥០ឆ្នាំ មុខរបរ កសិករ ទីលំនៅបច្ចុប្បន្នភូមិកោះព្នៅ ឃុំ អូរស្វាយ ស្រុកថាឡាបរិវ៉ាត់ ខេត្តស្ទឹងត្រែង។
របាយការណ៍ដដែលនេះ បានបង្ហាញថា បុរសវ័យ៥០ឆ្នាំនេះ បានប្រព្រឹត្តបទល្មើស នៅចំណុចផ្ទះសំណាក់ មីលីមូលមិត្ត ស្ថិតក្នុងភូមិព្រែក សង្កាត់ស្ទឹងត្រែង ក្រុងស្ទឹងត្រែង ខេត្ត ស្ទឹងត្រែង នាថ្ងៃទី៨ ខែ មករា ឆ្នាំ២០១៩ ហើយមន្ត្រីអនុវត្ត នៃការិយាល័យប្រឆាំងគ្រឿងញៀន បានបង្ក្រាបករណីជួញដូរ ដោយខុសច្បាប់នូវសារធាតុញៀននេះ ដោយចាប់យកវត្ថុតាងជាថ្នាំញៀនប្រភេទក្រាមពណ៌សថ្លាចំនួន ១កញ្ចប់ធំ ទម្ងន់សរុប ១០៥,២៥ក្រាម ។ មន្ត្រីអនុវត្តច្បាប់ នៃការិយាល័យប្រឆាំងគ្រឿងញៀន កំពុងឃាត់ខ្លួន រៀបចំសំណុំឯកសារបញ្ជូនជនសង្ស័យ និងវត្ថុតាង ទៅអយ្យការអមសាលាដំបូងខេត្ត និងស្វែងរកមុខសញ្ញា ពាក់ព័ន្ធផ្សេងទៀត ដើម្បីចាត់ការតាមនីតិវិធី ៕ ដោយ ៖ បញ្ញាស័ក្តិ
