ភ្នំពេញ ៖ មន្ត្រីជាន់ខ្ពស់នគរបាលផ្កាយ១ មួយរូប និងកូនចៅ ជាមន្ត្រីប៉ូលិស៥រូប ផងដែរ ត្រូវបាន នគរបាលក្រសួងមហាផ្ទៃ អគ្គស្នងការតម្រួតបទបញ្ជារ ចុះចាប់ខ្លួនភ្លាមៗ យ៉ាងតក់ក្រហល់ ញាត់ចូលរថយន្តតម្រួតទាំងបង្ខំ នៅថ្ងៃទី១០ ខែមករា ឆ្នាំ២០១៩នេះ ស្ថិតនៅផ្លូវ១០១៩ សង្កាត់ទឹកថ្លា ខណ្ឌសែនសខ រាជធានីភ្នំពេញ ។ ការចាប់ខ្លួនដែលធ្វើឡើងដោយអង្គភាពតម្រួតបទបញ្ជា ប្រដាប់ដោយអាវុធវែងប្រភេទអាកាគ្រប់ដៃបែបនេះ គេមិនទាន់ដឹងមូលហេតុច្បាស់លាស់នៅឡើយ។
នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានប្រាប់បណ្តាញព័ត៌មានក្នុងស្រុកថា ពិតជាមានការឃាត់ខ្លួន មន្ត្រីនគរបាលទាំងនោះមែន ដែលពួកគេនៅខាងប្រឆាំងទំនិញក្លែងក្លាយ ប៉ុន្តែក្រោយការសួរនាំ ក៏ឲ្យត្រឡប់ទៅវិញតែម្តង។
បើតាមនាយឧត្តមសេនីយ៍ ការឃាត់ខ្លួនពួកគេ ដោយសារមុនដំបូង ពេលដែលពួកគេចុះទៅនោះ មិនបានសហការ ជាមួយខាងស្នងការដ្ឋាននគរបាលរាជធានីភ្នំពេញ ក៏បានឲ្យខាងតម្រួតបទបញ្ជា ចុះទៅឃាត់ខ្លួនតែម្តង ប៉ុន្តែក៏បានឲ្យត្រឡប់ទៅវិញភ្លាមៗផងដែរ មិនមានរឿងអ្វីនោះឡើយ។
មន្ត្រីនគរបាលខណ្ឌសែនសុខ បានឲ្យដឹងថា ពិតជាមានការឃាត់ខ្លួនមន្ត្រីនគរបាលទាំងនេះមែន ដោយចាប់ក្រៀកបញ្ជូនឡើងរថយន្តតែម្តង៕ ដោយ ៖ បញ្ញាស័ក្តិ
