កណ្ដាល ៖ នារី២នាក់បើកបរម៉ូតូឌុបគ្នាបញ្ច្រាស់ផ្លូវ ត្រូវរថយន្តមួយគ្រឿងបើកបុកពេញមួយទំហឹង បណ្ដាលឲ្យស្លាប់ទាំង២នាក់ ករណីខាងលើនេះបានកើតឡើង នៅវេលាម៉ោង២៣និង១០នាទី ថ្ងៃទី១១ ខែមករា ឆ្នាំ២០១៩ ត្រង់ចំណុចផ្សារដើមមៀន តាមបណ្ដោយផ្លូវលេខ២០៦ ស្ថិតនៅភូមិដើមមៀន សង្កាត់ដើមមៀន ក្រុងតាខ្មៅ ។
មន្ត្រីនគរបាលចរាចរណ៍ក្រុងតាខ្មៅ បានឲ្យដឹងថា នារីរងគ្រោះស្លាប់មាន២នាក់ ពុំស្គាល់អត្តសញ្ញាណ ម៉ាកហុងដាឌ្រីម ធុនសេ១២៥ពណ៌ខ្មៅ ពាក់ស្លាកលេខ ភ្នំពេញ1CY-8027 ។ចំណែកអ្នកបើកបររថយន្តឈ្មោះ តារា រតនា ភេទប្រុស អាយុ១៩ឆ្នាំ មានទីលំនៅភូមិថ្មី សង្កាត់តាខ្មៅ ក្រុងតាខ្មៅ បើករថយន្តម៉ាកម៉ាកLexus ពណ៌សក្រម៉ៃ ពាក់ស្លាកលេខ កណ្ដាល 2D-5767 ។
នៅមុនពេលកើតហេតុ សាក្សីបានឃើញនារីរងគ្រោះទាំង២នាក់ បើកបរម៉ូតូឌុបគ្នា ក្នុងទិសដៅពីជើងទៅត្បូង ដោយបើកបរបញ្ច្រាសផ្លូវ លុះមកដល់ចំណុចកើតហេតុ ក៏បានបុកជាមួយរថយន្តខាងលើពេញមួយទំហឹង ដែលរថយន្តបើកបរក្នុងទិសដៅពីត្បូងទៅជើងក្នុងល្បឿនលឿន បណ្ដាលឲ្យនារីរងគ្រោះ ជាអ្នកបើកបរម៉ូតូស្លាប់បាត់បង់ជីវិតទាំង២នាក់ ។ នគរបាលចរាចរណ៍ចុះមកអន្តរាគមន៍កន្លែងកើតហេតុ រួចធ្វើការឃាត់ខ្លួនអ្នកបើកបររថយន្ត និងរថយន្តទុក និងធ្វើការវាស់វែង កសាងឯកសារយកមធ្យោបាយពាក់ព័ន្ធ និងនាំខ្លួនអ្នកបើករថយន្តយកមកអធិការដ្ឋាននគរបាលក្រុង ដើម្បីចាត់ការតាមនីតិវិធីច្បាប់ ។ ចំពោះអ្នកសាកសពនារីរងគ្រោះទាំង២នាក់ សមត្ថកិច្ចយកទៅតម្កល់ទុករងចាំសាច់ញាតិយកទៅចាត់ចែងធ្វើបុណ្យតាមប្រពៃណី ។
តាមការសន្និដ្ឋានរបស់សមត្ថកិច្ច បានឲ្យដឹងថា ករណីខាងលើនេះ គឺបណ្ដាលមកពីអ្នកបើកម៉ូតូ បើកបញ្ច្រាសផ្លូវ ចំណែកឯអ្នកបើករថយន្ត បើកបរក្នុងល្បឿនលឿន ខ្វះការប្រុងប្រយ័ត្ន៕ ដោយ ៖ បញ្ញាស័ក្តិ
