ខេត្តស្វាយរៀង ៖ មានហេតុការណ៍ភ្នាក់ផ្អើលទាំងព្រឹកព្រលឹមខណៈដែលមានជនមិនស្គាល់មុខ បានពួនបាញ់ចម្ពាមកៅស៊ូ ជាមួយគ្រាប់ឃ្លីដែក សំដៅទៅលើតូបអ្នកលក់ទូរស័ព្ទដែលមានស្លាកយីហោដារ៉ា តែមិនបានបង្ករគ្រោះថ្នាក់ដល់អ្នកលក់ឡើយ។
ហេតុការណ៍នេះបានកើតឡើងកាលពីវេលាម៉ោង៦និង៤០នាទីព្រឹកថ្ងៃទី១៦ ខែមករា ឆ្នាំ២០១៩នៅត្រង់ចំណុចខាងមុខផ្សារវាលយន្ត ស្ថិតក្នុងភូមិវាលយន្ត សង្កាត់ស្វាយរៀង ក្រុងស្វាយរៀង។
បើតាមសមត្ថកិច្ចក្រុងស្វាយរៀងបានឲ្យដឹងថា មានកណីបាញ់គ្រាប់ឃ្លីដែក ចេញពីជនសង្ស័យមិនស្គាល់អត្តសញ្ញាណបានធ្វើសកម្មភាពបាញ់ចម្ពាមគ្រាប់ឃ្លីដែកចំនួនពីរគ្រាប់ទៅលើតូបលក់ទូរស័ព្ទមួយកន្លែងបណ្តាលឲ្យត្រូវចំទូរតាំងលក់ទូរស័ព្ទមួយគ្រាប់ និងត្រូវជញ្ជាំងតូបមួយគ្រាប់ប៉ុន្តែ មិនបានបង្កឲ្យមានគ្រោះថ្នាក់ដល់មនុស្សទេ។
សមត្ថកិច្ចបានបន្តទៀតថា ម្ចាស់តូបឈ្មោះ យោគ ចាន់ដាវី ភេទស្រី ជនរងគ្រោះជាម្ចាស់តូបឈ្មោះ យោគ ចាន់ដាវី ភេទស្រី អាយុ៣៣ឆ្នាំ មុខរបរលក់ទូរស័ព្ទរស់នៅភូមិវាលយន្ត សង្កាត់ស្វាយរៀង ក្រុងស្វាយរៀង។
បេីតាមសម្តីម្ចាស់តូបលក់ទូរសព្ទ័ ដែលមានហីហោរ ដារ៉ា បានប្រាប់អោយដឹងថារាល់ព្រឹកគាត់ក្រោកពីព្រលឹមដើម្បីរៀបចំអីវ៉ាន់សំរាប់លក់ដូចសព្វមួយដងតែថ្ងៃនេះ គាត់ចាប់ផ្តើមរៀបបានតែបន្តិចក៏លឺសូរសម្លេងប្រ៉ាវៗចំនួនពីរដងចំទូរខាងលិចផ្ទួនៗគ្នាតែម្តង ស្រាប់តែឃើញធ្លុះទូរលក់មួយគ្រាប់និងត្រូវជញ្ជាំងតូបគ្រាប់។
បើតាមបញ្ជាក់ពីម្ចាស់តូបលក់ទូរស័ព្ទខាងលើបានឲ្យដឹងថា រូបគាត់មិនដែលមានទំនាស់ជាមួយអ្នកណាឡើយ ក្នុងការប្រកបរបរលក់ទូរស័ព្ទ ហើយការបាញ់មកតូបគាត់ក៏មិនដឹងមូលហេតុយ៉ាងណានោះដែរ។ទោះបីយ៉ាងម្ចាស់តូបលក់ទូរសព្ទ័ខាងលើអំពាវនាវដល់សមត្ថកិច្ចជួយស្រាវជ្រាវចាប់ជនសង្ស័យមកផ្តន្ទាទោសទៅតាមច្បាប់ផងដែរ៕ ដោយ ៖ វ៉ៃគោ
