ខ្មាន់កាំភ្លើងបានធ្វើការវាយប្រហារទៅលើសណ្ឋាគារប្រណីតមួយកន្លែងស្ថិតក្នុងទីក្រុង Nairobi ប្រទេសកេនយ៉ា បណ្តាលឲ្យមនុស្សយ៉ាងហោចណាស់ចំនួន ១៥នាក់បានស្លាប់។ នេះបើតាមការចុះផ្សាយរបស់ BBC នៅរសៀលថ្ងៃពុធ ទី ១៦ ខែមករានេះ។
អាគារដែលរងការវាយប្រហារពីខ្មាន់កាំភ្លើងកាលពីថ្ងៃអង្គារម្សិលមិញនេះ គឺមានសណ្ឋាគារ DusitD2 ព្រមទាំងការិយាល័យធ្វើការផងដែរ។
ក្រោយពេលការវាយប្រហារបានស្ងប់ស្ងាត់ ក្រុមសកម្មប្រយុទ្ធដែលមានមូលដ្ឋានក្នុងប្រទេសសុម៉ាលី បានចេញមុខអះអាងថា ក្រុមខ្លួនជាអ្នកនៅពីក្រោយការវាយប្រហារនោះ។
ប្រភពពីប៉ូលីសបានឲ្យដឹងថា មនុស្សចំនួន ១៥នាក់ត្រូវបានសម្លាប់ ប៉ុន្តែចំនួនផ្លូវការមិនទាន់ត្រូវបានបញ្ចេញដោយរដ្ឋាភិបាលនៅឡើយទេ។
ប្រជាជនស៊ីវិលមួយចំនួន ត្រូវបានគេរាយការណ៍ថា កំពុងជាប់ក្នុងអាគារនោះ ខណៈមួយចំនួនទៀត បានធ្វើការលាក់ខ្លួន និងបានផ្ញើសារតាមទូរស័ព្ទមកកាន់សាច់ញាតិពួកគេ។
ក្នុងចំណោមអ្នកស្លាប់ ក៏មានជនជាតិអាមេរិចម្នាក់ផងដែរ។ នេះបើយោងតាមក្រសួងការបរទេសអាមេរិច។
ការវាយប្រហារបានកើតឡើងនៅម៉ោង ១៥ ម៉ោងក្នុងប្រទេសកេនយ៉ា នៅពេលខ្មាន់កាំភ្លើងចំនួន ៤នាក់បានបោះគ្រាប់បែកដាក់រថយន្តនៅកន្លែងចតរថយន្ត មុនពេលពួកគេបានចូលទៅកាន់ច្រក ហើយនៅទីនោះមានពួកសកម្មប្រយុទ្ធម្នាក់បានចុចបំផ្ទុះ
ខ្លួនឯង។
ស្ត្រីម្នាក់ដែលធ្វើការនៅអាគារមួយខ្នង ក្បែរកន្លែងរងការវាយប្រហារ បានថ្លែងប្រាប់សារពត៌មាន Reuters ថា “ខ្ញុំបានចាប់ផ្តើមលឺសូរសម្លេងកាំភ្លើង ហើយបន្ទាប់មកក៏ឃើញមនុស្សម្នាជាច្រើន រត់ចេញមកក្រៅដោយលើកដៃពួកគេ ចំណែកអ្នកខ្លះបានចូលក្នុងធនាគារដើម្បីលាក់ខ្លួន”។
រដ្ឋលេខាធិការនៃគណៈរដ្ឋមន្ត្រីផ្ទៃក្នុងរបស់កេនយ៉ា លោក Fred Matiang’i បាននិយាយថា អាគារដែលរងការវាយប្រហារត្រូវបានគ្រប់គ្រងវិញដោយកងកម្លាំងសន្តិសុខ ហើយប្រទេសស្ថិតក្នុងសុវត្ថិភាព៕ សុភ័ក្ត្រ
ប្រភព៖ BBC