ប្រទេសចិនបានច្រានចោលការចោទប្រកាន់របស់ប្រទេសកាណាដា ដែលថាខ្លួនបានអនុវត្តទោសប្រហារជីវិតតាមអំពើចិត្តទៅលើពលរដ្ឋកាណាដាម្នាក់ពីបទរត់ពន្ធគ្រឿងញៀន។
ជុំវិញការចោទប្រកាន់នេះ ក្រសួងការបរទេសចិន បានប្រាប់នាយករដ្ឋមន្ត្រីកាណាដា លោក Justin Trudeau អោយឈប់ថ្លែងដោយគ្មានការទទួលខុសត្រូវបែបនោះ។ ចិនក៏បានបកចោទប្រកាន់កាណាដាវិញដែរថា បានអនុវត្តស្តង់ដាមិនស្មើភាពគ្នា។
កាលពីថ្ងៃច័ន្ទដើមសប្តាហ៍នេះ តុលាការចិនបានបានសម្រេចកាត់ទោសប្រហារជីវិតពលរដ្ឋកាណាដាម្នាក់ឈ្មោះ Robert Lloyd Schellenberg ពីបទរត់ពន្ធគ្រឿងញៀន ២២២គីឡូក្រាមកាលពីឆ្នាំ ២០១៤។
លោក Robert Lloyd Schellenberg កាលពីខែវិច្ឆការ ត្រូវបានតុលាការកាត់ទោសអោយជាប់គុកតែ ១៥ឆ្នាំប៉ុណ្ណោះ ប៉ុន្តែនៅថ្ងៃច័ន្ទនេះ ស្រាប់តែតុលាការចិនបានសម្រេចប្តូរទៅទោសប្រហារជីវិតវិញ។ ការសម្រេចបែបនេះ ជាហេតុនាំឲ្យប្រទេសកាណាដា ចោទចិនថា បានអនុវត្តទោសតាមតែអំពើចិត្ត។
ការសម្រេចជាថ្មីរបស់តុលាការចិន រឹតតែធ្វើឲ្យទំនាក់ទំនងការទូតរវាងប្រទេសទាំងពីរ កាន់តែតានតឹងខ្លាំង ចាប់តាំងពីមានការចាប់ខ្លួនប្រធានផ្នែកហិរញ្ញវត្ថុរបស់ក្រុមហ៊ុន Huawei កាលពីខែធ្នូកន្លងទៅក្នុងប្រទេសកាណាដា។
ចិនបានសម្តែងការខឹងសម្បារយ៉ាងខ្លាំងចំពោះការចាប់ខ្លួនអ្នកស្រី Meng Wanzhou ដែលជាកូនស្រីបង្កើតរបស់ស្ថាបនិកក្រុមហ៊ុន Huawei។ អ្នកស្រីត្រូវបានអាជ្ញាធរកាណាដា ចាប់ខ្លួនតាមសំណើររបស់អាមេរិច ជាប់សង្ស័យពីបទបង្កើតក្រុមហ៊ុនសាខា ដើម្បីជួយអ៊ីរ៉ងអោយគេចផុតពីទណ្ឌកម្មរបស់អាមេរិច។
កាណាដាបានចោទចិនថា បានយកករណីប្រហារជីវិតពលរដ្ឋកាណាដា ដើម្បីឆ្លើយតបទៅនឹងការចាប់ខ្លួនអ្នកស្រី Meng Wanshou ប៉ុន្តែត្រូវបានអ្នកនាំពាក្យក្រសួងការបរទេសចិនធ្វើការបដិសេធ និងបានជំរុញឲ្យកានាដា គោរពអធិបតេយ្យភាពប្រព័ន្ធយុត្តិធម៌ចិន៕ សុុភ័ក្ត្រ
ប្រភព៖ BBC