ប្រទេសចិន បានចាប់ផ្តើមកសាងបណ្តាជំរុំជនភៀសខ្លួននៅកៀកព្រំដែនកូរ៉េខាងជើង ដោយសារកង្វល់ពិភពលោកធ្លាក់ក្នុងភ្លើងសង្គ្រាម។
មេដឹកនាំកូរ៉េខាងជើង Kim Jong-Un បានគំរាមកំហែងកម្ទេចអាមេរិកតាមរយៈកម្មវិធីអាវុធនុយក្លេអ៊ែរ បន្ទាប់ពីអាវុធថ្មីបំផុតរបស់ប្រទេសនេះ បានសាកល្បងកន្លងមកអាចបាញ់រំលងដល់ដែនគោកអាមេរិក ។ ប្រធានាធិបតីអាមេរិក Donald Trump បានគំរាមថា នឹងពន្លិចកូរ៉េខាងជើងក្នុងភ្លើងកំហឹង ប្រសិនបើលោក Kim Jong Un ហ៊ានបាញ់កាំជ្រួចអន្តរទ្វីបវាយលុកទឹកដីអាមេរិក។
ដោយសារតែហានិភ័យនៃជម្លោះយោធា អាចផ្ទុះឡើងគ្រប់ពេល ចិនបានបង្ហើបឲ្យដឹងនូវផែនការកសាងបណ្តាជំរុំជនភៀសខ្លួននៅព្រំប្រទល់កូរ៉េ។
តាមកាសែត Daily star China Mobile ត្រូវបានសំណូមពរឲ្យត្រៀមបំរុង ព្រោះ “ស្ថានការណ៍តានតឹងតាមបណ្តោយព្រំដែនកូរ៉េ”។ អ្នកជំនាញការកូរ៉េខាងជើង Zhang Liangui និយាយបន្ថែមថា ការរៀបចំជំរុំទុកជាមុនជំរុំជនភៀសខ្លួន គឺជា “រឿងសមហេតុផល”។
លោកពោលបន្ថែមថា ៖ “អាចនឹងកើតមាននូវជម្លោះរវាងអាមេរិក និងកូរ៉េខាងជើងកើតឡើង ហើយចិនត្រូវគិតគូរដល់ករណីអាក្រក់នេះ”។
រីឯរដ្ឋការចិនវិញ ពុំមានការប្រកាសផ្លូវការណាមួយអំពីព័ត៌មានដែលប្រព័ន្ធផ្សព្វផ្សាយបានលើកឡើងនោះទេ៕ សូនយន
