ខេត្តព្រះសីហនុ ៖ ស្នងការរងនគរបាលខេត្តព្រះសីហនុ លោកឧត្តមសេនីយ៍ត្រី អ៊ី សុខា បានឲ្យដឹងនៅថ្ងៃពុធ ទី១៧ ខែមករា ឆ្នាំ២០១៩នេះថា ដោយមានបទបញ្ជា និង ការចង្អុលបង្ហាញពី ឯកឧត្ដម យន្ត មីន អភិបាលនៃគណៈអភិបាលខេត្តព្រះសីហនុ និងមានបញ្ជាផ្ទាល់ពី ឯកឧត្ដម ឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ព្រះសីហនុ រូបលោកបានដឹកនាំបញ្ជាកម្លាំងការិយាល័យនគរបាលចរាចរណ៍ផ្លូវគោក ចុះតាមគោលដៅនានា ដើម្បីរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក ចំពោះរថយន្តដឹកដី ដឹកខ្សាច់ ដែលមិនគ្រប ហើយបានដឹកដីធ្លាក់លើផ្លូវ និងរថយន្តធុនធំចូលក្នុងក្រុងខុសពេលវេលាកំណត់ ដោយបានឃាត់ទុករថយន្តមួយចំនួន ដើម្បីរកដំណោះស្រសយនៅពេលក្រោយ។
លោក អ៊ី សុខា សង្កត់ធ្ងន់ថា កម្លាំងនគរបាលចរាចរណ៍ផ្លូវគោក នឹងបន្តចុះរឹតបន្តឹងការចុះឃាត់រថយន្តបង្ក យកមករក្សាទុកនៅការិយាល័យនគរបាលចរាចរណ៍ផ្លូវគោក ដើម្បីអនុវត្តតាមនីតិវិធីច្បាប់ជាប្រចាំ ដោយមិនលើកលែងនោះទេ។
ឆ្លៀតក្នុងឱកាសនេះដែរ លោកឧត្តមសេនីយ៍ត្រី អ៊ី សុខាស្នងការរងផែនសណ្តាប់ធ្នាប់ ក៏បានអំពាវនាវដល់បងប្អូនប្រជាពលរដ្ឋទាំងអស់ ដែលជាតំណាងក្រុមហ៊ុនដឹកដី ដឹកខ្សាច់ និងរថយន្តដឹកទំនិញផ្សេងៗ ត្រូវចូលរួមសហការអនុវត្តតាមសេចក្តីជូនដំណឹង របស់រដ្ឋបាលខេត្តព្រះសីហនុ ឱ្យបានទាំងអស់គ្នា។ លោកបន្តថា ចំពោះករណីខាងលើនេះ ប្រសិនជាមានមន្ត្រីនគរបាលចរាចរណ៍រូបណាហ៊ានធ្វើកាងារខុសតាមបទបញ្ជា សូមជួយរាយការណ៍ ឬផ្តល់ព័ត៌មានមករូបលោកដោយអនុគ្រោះ ដើម្បីឈានទៅមានវិធានការតាមវុន័យរដ្ឋបាល របស់កងកម្លាំងនគរបាលជាតិ។
ជាងនេះទៀត លោក អ៊ី សុខា ព្រមានថា ចំពោះករណី ដែលអាចមានកងកម្លាំងនគរបាលចរាចរណ៍ផ្លូវគោក រូបណាហ៊ានយកលុយពីអ្នកបើកបររថយន្ដូចបានរៀបរាប់ខាងលើ ដោយខុសពីគោលការណ៍ណែនាំ របស់ ស្នងការដ្ឋាននគរបាលខេត្តព្រះសីហនុ និងអនុវត្តតាមវិន័យកងកម្លាំងនគរបាលជាតិ មិនលើកលែងឲ្យឡើយ៕ ដោយ ៖ ដែន សីមា