មេមត់ ៖ មានគ្រោះថ្នាក់ចរាចរ កើតឡើងរវាងម៉ូតូ និងរថយន្ត ដែលបង្កឲ្យយុវជនម្នាក់ស្លាប់ ពេលបញ្ជូនមកដល់មន្ទីរពេទ្យបង្អែកស្រុកមេមត់ ឯម្នាក់ទៀតរបួសធ្ងន់ បញ្ជូនសង្គ្រោះបន្ត នៅមន្ទីរពេទ្យខេត្តកំពង់ចាម ដែលហេតុការណ៍កើតឡើង នៅថ្ងៃទី១៦ ខែមករា ឆ្នាំ២០១៩ វេលាម៉ោង ១៩ និង ២០ នាទី នៅលើផ្លូវជាតិលេខ៧ ចន្លោះបង្គោលគីឡូម៉ែត្រលេខ២១២-២១៣ ស្ថិតនៅភូមិរោងចក្រស្ក ឃុំត្រមូង ស្រុកមេមត់ ខេត្តត្បូងឃ្មុំ ។
បើយោងតាមកន្លែងកើតហេតុសមត្ថកិច្ច មូលដ្ឋាន បានឲ្យដឹងថា ៖ ម៉ូតូម៉ាកអ៊ឹមអេសអ៊ិច (MSX) ពណ៌ស បើកបរពីទិសខាងលិចទៅទិសខាងកើត ដោយល្បឿនយ៉ាងលឿង និងគ្មានភ្លើងសម្រាប់បំភ្លឺផ្លូវ មកដល់ចំណុចកើតហេតុ បានបុកគ្នា ជាមួយរថយន្តធុនធំមួយគ្រឿង មិនស្គាល់ម៉ាក បុកពីក្រោយពេញទំហឹងតែម្ដង ។ ក្រោយកើតហេតុរថយន្តធុនធំមួយគ្រឿង មិនស្គាល់ម៉ាក បើករថយន្តគេចចេញពីកន្លែងកើតហេតុ។
សមត្ថកិច្ចយើងបានដឹងបន្ថែមទៀតថា ៖ ម៉ូតូម៉ាកMSX បើកបរដោយឈ្មោះ ឡុង ឌី ភេទប្រុស អាយុ២០ឆ្នាំ ជាតិខ្មែរ រស់នៅភូមិខ្នងក្រពើលិច ឃុំត្រមូង ស្រុកមេមត់ ខេត្តត្បូងឃ្មុំ (ស្លាប់ពេលបញ្ជូនដល់មន្ទីរពេទ្យបង្អែកស្រុកមេមត់) និងរួមដំណើរឈ្មោះ ឈាង ដារ៉ូ ភេទប្រុស អាយុ១៩ឆ្នាំ ជាតិខ្មែរ រស់នៅភូមិខ្នងក្រពើលិច ឃុំត្រមូង ស្រុកមេមត់ ខេត្តត្បូងឃ្មុំ (របួសធ្ងន់) ។ ចំណែកឯម៉ូតូចំនួន១គ្រឿង សមត្ថកិច្ចនគរបាលចរាចរណ៍ បានយកមករក្សាទុក នៅអធិការដ្ឋាននគរបាលស្រុកមេមត់ ដើម្បីធ្វើការស្រាវជ្រាវ និងបំពេញសំណុំរឿងតាមនីតិវិធី៕ ដោយ ៖ រចនា
