ខេត្តស្វាយរៀង ៖ បុរសម្នាក់បានស្លាប់នៅក្នុងស្រះទឹកស្ថិតនៅផ្ទះឪពុកម្តាយក្មេកដោយសារតែបូមស្រះរីងហើយក៏យកខ្សែភ្លើងមករាយដើម្បីឆក់ត្រីប៉ុន្តែអកុសត្រូវឆក់ខ្លួនឯងស្លាប់ចោលប្រពន្ធកូនខ្ចីទើបតែសម្រាលបានជិត១០ទៅវិញ។
ជនរងគ្រោះដោយខ្សែភ្លើងឆក់ស្លាប់នោះមានឈ្មោះ អ៊ុក ភិរម្យ អាយុ ២៨ឆ្នាំមានទីលំនៅភូមិ បុស ឃុំ ស្វាយតាយាន ស្រុក កំពង់រោទិ៍ខេត្តស្វាយរៀង។
ហេតុការណ៍នេះបានកើតឡើងកាលពីវេលាម៉ោង៩:២០នាទីព្រឹកថ្ងៃទី១៧ខែមករាឆ្នាំ២០១៩នេះនៅផ្ទះម្តាយក្មេកស្ថិតក្នុងភូមិ ត្រពាំងឈូក ឃុំ ខ្សែត្រ ស្រុក កំពង់រោទិ៍ ខេត្ត ស្វាយរៀង។បើតាមក្រុមគ្រួសារសពបានឲ្យដឹងថា៖នៅមុនពេលកើតហេតុនោះគឺជនរងគ្រោះជាបងប្អូនសាច់ញាតិបាននាំគ្នាបូមទឹកស្រះដើម្បីយកមកធ្វើម្ហូបដែលជាថ្ងៃចូលរោងការបងថ្លៃស្រី។ប្រភពបានបន្តទៀតថា៖ក្រោយពីបូមទឹកចេញពីស្រះរីងអស់ហើយនោះក៏នាំចាប់ត្រីអស់ហើយគេនាំគ្នាឡើងលើគោកអស់នៅសល់តែជនរងគ្រោះរាយខ្សែភ្លើងដើម្បីឆក់ត្រីបន្តដោយមានអ្នកឈរមើលនិងឈរចាំទទួលត្រីដោយមិនដឹងថាជនរងគ្រោះឆក់នោះទេ។
ប្រភពបានបន្ថែមទៀតថា៖លុះជនរងគ្រោះឆក់ដួលភួកល្បាប់ទើបដឹងថាត្រូវខ្សែភ្លើងឆក់ប៉ុន្តែហួសពេលទៅហើយដោយស្លាប់ភ្លាមៗនៅកន្លែងកើតហេតុ។ក្រោយពីទទួលដំណឹងថាមានមនុស្សត្រូវខ្សែភ្លើងឆក់ស្លាប់សមត្ថកិច្ច មូលដ្ឋានក៏បានចុះមកដល់កន្លែងកើតហេតុដើម្បីធ្វើកោសលវិច្ច័យលើសាកសពក្រោយពីពិនិត្យរួចសមត្ថកិច្ចបានប្រគល់សាកសពអោយទៅក្រុមគ្រួសារយកទៅធ្វើបុណ្យតាមប្រពៃណីផងដែរ៕ ដោយ ៖ វ៉ៃគោ