ភ្នំពេញ ៖ ពាក់ព័ន្ធនឹងការផ្សព្វផ្សាយនូវព័ត៌មានក្លែងក្លាយ (Fake News) ដែលបំផុសបំផុលថា អឺរ៉ុប ដកប្រព័ន្ធអនុគ្រោះពន្ធអ្វីៗទាំងអស់ លើកលែងតែអាវុធ (EBA) ពីកម្ពុជា រាជរដ្ឋាភិបាល នឹងចាត់វិធានការដោយម៉ឺងម៉ាត់ និងគ្រប់រូបភាព ក្នុងកិច្ចថែរក្សាសតិអារម្មណ៍សាធារណៈ ឱ្យស្ថិតនៅក្នុងស្ថិរភាព និងកិច្ចសហប្រតិបត្តិការគ្រប់ជ្រុងជ្រោយ ប្រឆាំងនឹងព័ត៌មានមិនពិត (Fake News) ។
នៅថ្ងៃទី១៧ខែមករានេះ ការិយាល័យអ្នកនាំពាក្យរាជរដ្ឋាភិបាលកម្ពុជា បានចេញសេចក្តីថ្លែងការណ៍ ដោយបានបញ្ជាក់ថា រាជរដ្ឋាភិបាលកម្ពុជា បានប្រកាសចាត់វិធានការប្រឆាំងនឹងព័ត៌មានក្លែងក្លាយ (Fake News) ដែលបំផុសបំផុលថា អឺរ៉ុបដកប្រព័ន្ធអនុគ្រោះពន្ធអ្វីៗទាំងអស់លើកលែងតែអាវុធ (EBA) ពីកម្ពុជា ។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានបញ្ជាក់តាមសេចក្តីថ្លែងការណ៍ថា រាជរដ្ឋាភិបាលកម្ពុជា សូមទាញអារម្មណ៍ជាថ្មីម្តងទៀត ចំពោះអ្នកឆ្លងឆ្លើយព័ត៌មានមួយចំនួន ក៏ដូចជាអ្នកធ្វើបទអត្ថាធិប្បាយ ដែលបានប្រើប្រាស់ពាក្យមិនពិតផង និងបង្កើតនូវទស្សនៈអវិជ្ជមាន មិនឆ្លើយតបទៅនឹងគោលការណ៍ជាក់ស្តែង ដែលបានធ្វើឱ្យមតិសាធារណជន មានការភាន់ច្រឡំ និងបង្កើតនូវឥរិយាបថ មិនអាចទទួលយកបាន ឆ្លើយតបនឹងសភាពការណ៍ជាក់ស្តែង នៃបរិបទ “អ្វីៗគ្រប់យ៉ាងលើកលែងតែសព្វាវុធ (EBA)” ដែលអាចចាត់ទុកជាកិច្ចបង្កើតនូវព័ត៌មានមិនពិត (Fake News) ។
រាជរដ្ឋាភិបាល មិនយល់ស្របជាដាច់ខាត ក្នុងកិច្ចប្រើពាក្យ “EU ទុកច្រកឱ្យរាជរដ្ឋាភិបាលកម្ពុជា” ឬពាក្យដទៃទៀតជាដើម ដែលជាពាក្យមិនសមស្របទៅនឹងចរិត ការងាររបស់រាជរដ្ឋាភិបាល ដែលជាដៃគូអភិវឌ្ឍពិតប្រាកដជាមួយEU នោះឡើយ នៅក្នុងកិច្ចលើកស្ទួយជីវិភាពពលរដ្ឋកម្ពុជា តាមរយៈកម្មវិធីនេះ។ ពាក្យទាំងនោះគឺស្ថិតនៅក្នុងបំណងញុះញង់ ឬប្រឆាំងនឹងភាពជាដៃគូរវាងកម្ពុជា និងសហភាពអឺរ៉ុប ។
រាជរដ្ឋាភិបាល បានធ្វើការពន្យល់ជាច្រើនសារមកហើយ នូវដំណើរការវិវឌ្ឍន៍ នៃកិច្ចពិភាក្សាក្នុងការអនុវត្តកម្មវិធី EBA ដែលស្ថិតនៅក្នុងបរិយាកាសដៃគូ និងគោរពគ្នាទៅវិញទៅមក នៅក្នុងលក្ខខណ្ឌប្រែប្រួល ដែលឆ្លើយតបទៅនឹងចំណូលកើនឡើង របស់ពលរដ្ឋកម្ពុជា ហើយកិច្ចពិភាក្សានេះ នឹងដំណើរការទៅមុខទៀត រហូតជាងមួយឆ្នាំ។
រាជរដ្ឋាភិបាល នៃប្រជាជាតិអធិបតេយ្យ សូមអំពាវនាវដល់រាល់បណ្តាលអង្គភាព ឬបុគ្គលពាក់ព័ន្ធ សូមរក្សាភាពថ្លៃថ្នូរ និងក្រមសីលធម៌ប្រកបដោយវិជ្ជាជីវៈខ្ពស់ ក្នុងកិច្ចរក្សាដំណើរការពិភាក្សានេះ ប្រកបដោយភាពវិជ្ជមាន និងស្ថិតនៅក្នុងភាពជាដៃគូអភិវឌ្ឍ ដោយមិនបង្កការភាន់ច្រឡំ ជាយថាហេតុណាមួយ ដែលកើតចេញពីការបង្កើតព័ត៌មានញុះញង់ ឬក្លែងក្លាយ (Fake News) នោះទេ។ រាជរដ្ឋាភិបាល នឹងចាត់វិធានការ ដោយម៉ឺងម៉ាត់ និងគ្រប់រូបភាព ក្នុងកិច្ចថែរក្សាសតិអារម្មណ៍ សាធារណៈ ឱ្យស្ថិតនៅក្នុងស្ថិរភាព និងកិច្ចសហប្រតិបត្តិការ គ្រប់ជ្រុងជ្រោយ ប្រឆាំងនឹងព័ត៌មានមិនពិត (Fake News) ។
សូមជម្រាបថា គណៈកម្មការអឺរ៉ុប បានចេញសេចក្តីប្រកាសព័ត៌មានមួយ បញ្ជាក់ថា សហគមន៍មួយនេះ នឹងចាប់ផ្តើមគិតពន្ធ លើការនាំចូលអង្កររបស់កម្ពុជា និងប្រទេសមីយ៉ាន់ម៉ា ដែលនាំចេញទៅកាន់ប្រទេស ដែលជាសមាជិកអឺរ៉ុប ចំនួន២៨ប្រទេស សម្រាប់រយៈពេល៣ឆ្នាំ ចាប់ពីឆ្នាំ២០១៩-២០២១។ ការគិតពន្ធនាំចូលអង្កររបស់កម្ពុជា ចាប់ផ្តើមអនុវត្តន៍ ចាប់ពីថ្ងៃទី១៨ ខែមករា ឆ្នាំ២០១៩តទៅ សម្រាប់រយៈពេល៣ឆ្នាំ ដោយឆ្នាំដំបូង តម្លៃពន្ធចំនួន១៧៥អឺរ៉ូ (ប្រហែល២០០ដុល្លារ) ក្នុង១តោន ឆ្នាំទី២ តម្លៃ១៥០អឺរ៉ូ (ប្រហែល១៧០ដុល្លារ) ក្នុង១តោន និងឆ្នាំទី៣ តម្លៃ១២៥អឺរ៉ូ (ប្រហែល១៤២ដុល្លារ) ក្នុង១តោន៕ ដោយ ៖ កូឡាប
