ព្រះសីហនុ ៖ ប្រជាពលរដ្ឋរាប់រយនាក់ ប្រដាប់ដោយកង់ឡាន និងកញ្ចុះរ៉ឺម៉ក បានព្យាយាមបិទផ្លូវ និងរារាំង ដោយការដុះកង់ឡាន ផ្សែងខ្មួលខ្មាញ់ ក្នុងបំណងបង្អាក់ដំណើររបស់ក្រុមការងារគណៈបញ្ជាការខេត្តព្រះសីហនុ ដឹកនាំដោយលោក ផៃ ប៊ុនវណ្ណៈ អភិបាលរងខេត្តព្រះសីហនុ សហការជាមួយកម្លាំងប៉ូលិស ចុះដើម្បីធ្វើការវាស់វែងដីមួយកន្លែង ទៅឲ្យលោក ជំទាវ ហុង ស៊ួន កាលពីព្រឹកថ្ងៃទី១៧ ខែមករា ឆ្នាំ២០១៩ ស្ថិតនៅខាងត្បូងវត្តអូរត្រេះ ភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
គណៈបញ្ជាការខេត្តព្រះសីហនុ ដឹកនាំដោយ លោក ផៃ ប៊ុនវណ្ណៈ អភិបាលរងខេត្ត បានថ្លែងទៅកាន់ពលរដ្ឋថា វត្តមានរបស់លោក ដែលចុះមកនេះដើម្បី វាស់វែងដីចំណុចនេះជូនលោកជំទាវ ហុង ស៊ួន ហើយបើបងប្អូនមានដីប៉ុន្មានទំហំប៉ុន្មាន គាត់ដោះស្រាយជូនបងប្អូន។ ប៉ុន្តែប្រសាសន៍ទាំងនេះ ត្រូវបានប្រជាពលរដ្ឋចោទថា កំពុងចង់បណ្ដេញពួកគាត់និងវាស់វែងដីគម្របព្រៃឈើ អនុក្រឹត្យរបស់រដ្ឋ ដែលពលរដ្ឋកំពុងរស់នៅជាក់ស្ដែងជាច្រើនឆ្នាំមកនេះ ឲ្យទៅបុគ្គលអ្នកមានលុយ និងមានអំណាចម្នាក់ នៅខេត្តព្រះសីហនុ គឺលោក ជំទាវ ហុង ស៊ួន និងឧកញ៉ា ស៊ីវ គង់ទ្រីវ (ប្ដី-ប្រពន្ធ)។
ប្រជាពលរដ្ឋកំពុងតែឆ្ងល់ថា ហេតុអ្វីគាត់រស់នៅលើដីរដ្ឋនេះយូរឆ្នាំមកហើយ បែរជាដល់ដីឡើងថ្លៃ គណ:បញ្ជាការខេត្ត លោក ផៃ ប៊ុនវណ្ណៈ នាំកម្លាំងប៉ូលិសមកវាស់វែងដីរបស់ពួកគាត់នេះ ទៅឲ្យបុគ្គលម្នាក់ ជំទាវ ហុងស៊ួន ។ ដីទាំងនេះ ជាដីអនុក្រឹត្យ និងគម្របព្រៃឈើ ឆ្នាំ២០០២ បាននិរាករណ៍អស់ទៅហើយ ដូច្នេះមានតែរដ្ឋបាលខេត្តព្រះសីហនុ យកប័ណ្ណកម្មសិទ្ធិ ដែលងាប់តាំងពីឆ្នាំ២០០២ ទៅហើយនេះព្យាយាមឲ្យរស់ឡើងវិញ ដើម្បីយកដីឲ្យជំទាវតែម្នាក់ ធ្វើឲ្យប្រជាពលរដ្ឋរាប់រយនាក់ស្រែកយំ។ ពួកគាត់បានអំពាវនាវទៅដល់ថ្នាក់ដឹកនាំ ជាពិសេសសម្ដេចតេជោ ហ៊ុន សែន ជួយដល់ពួកគាត់ផង៕ ដោយ ៖ ស្រីនាថ
