ភ្នំពេញ៖ រដ្ឋបាលរាជធានីភ្នំពេញ បានបើកកិច្ចប្រជុំត្រួតពិនិត្យ គម្រោងសាងសង់ផ្លូវ អមសងខាងផ្លូវរថភ្លើងពីផ្លូវលេខ៧០ មកដល់មហាវិថី គីម អ៊ីលស៊ុង ក្រោមអធិបតីភាព លោក ឃួង ស្រេង អភិបាលរាជធានីភ្នំពេញ នារសៀលថ្ងៃទី១៧ ខែមករា ឆ្នាំ២០១៩។
ក្នុងកិច្ចប្រជុំនោះ លោកអភិបាលរាជធានី បានបញ្ជាក់ថា៖ ដោយពិនិត្យឃើញថា ស្ថានភាពចរាចរ នៅតាមបណ្ដោយផ្លូវលេខ៧០ មករង្វង់មូលកួចកាណុង និងនៅតាមបណ្ដោយផ្លូវជាតិលេខ៥ ចាប់ពីគល់ស្ពានជ្រោយចង្វា ដល់ចំណុចស្ថានីយ៍ទូរទស្សន៍ ស៊ីធីអិន មានលំហូរចរាចរយ៉ាងខ្លាំង និងតែងតែកកស្ទះចរាចរជារៀងរាល់ថ្ងៃនោះ រដ្ឋបាលរាជធានីភ្នំពេញ បានអនុញ្ញាតឱ្យមន្ទីរសាធារណការ និងដឹកជញ្ជូនរាជធានីភ្នំពេញ ចុះសិក្សាគម្រោងសាងសង់ផ្លូវ ស្របតាមបណ្ដោយផ្លូវរថភ្លើង ចាប់ពីផ្លូវជាតិលេខ៥ ដល់ផ្លូវលេខR6 ដែលមានប្រវែង ៦.២៨០ម៉ែត្រ ដោយអនុវត្តជាពីរជំហាន៕ ដោយ៖កូឡាប