ភ្នំពេញ៖ លោក វង្ស ប៊ុនវិសុទ្ធ ព្រះរាជអាជ្ញារងអមសាលាដំបូងរាជធានីភ្នំពេញ នៅរសៀលថ្ងៃទី១៧ ខែមករា ឆ្នាំ២០១៩នេះ បានចោទប្រកាន់ជនជាតិចិនម្នាក់ ករណីបង្ខំ ឲ្យស្ដ្រីម្នាក់វះកាត់ និងបង្ខាំងទុកស្ត្រីជាម្តាយទាំងយប់ ព្រោះគ្មានលុយថ្លៃព្យាបាល នៅក្នុងមន្ទីរពេទ្យវ៉ិចតូរៀចំនួនពីរបទល្មើស គឺពីបទ “បង្ខាំងមនុស្សដោយខុសច្បាប់ និងបទកំហែងយក”។
លោកព្រះរាជអាជ្ញារង វង្ស ប៊ុនវិសុទ្ធ ក៏បានបញ្ជូនសំណុំរឿងនេះ ទៅកាន់ចៅក្រមស៊ើបសួរ ដើម្បីបន្តនីតិវិធីតុលាការ។
សូមបញ្ជាក់ថា ករណីនេះកើតឡើង នៅវេលាម៉ោងប្រមាណ៨យប់ថ្ងៃទី១៣ ខែមករា ឆ្នាំ២០១៩ នៅមន្ទីរពេទ្យវ៉ិចតូរៀ មានទីតាំងនៅផ្ទះលេខ៦១A ផ្លូវលេខ ៥៩២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ដែលជារបស់លោកស្រីវេជ្ជបណ្ឌិត សៀង សុគន្ធ អ្នកទទួលខុសត្រូវ មន្ទីរពេទ្យវ៉ិចតូរៀ៕ ដោយ៖កូឡាប
