ខេត្តព្រះសីហនុ ៖ ប្រធានក្រុមហ៊ុន ជី.ធី.វី.ស៊ី,ស្ពីដបូត កម្ពុជា (G.T.V.C, Speed Boat Cambodia) គឺលោកឧកញ៉ា ទៀ វិចិត្រ នៅថ្ងៃព្រហស្បតិ៍ ទី១៧ ខែមករា ឆ្នាំ២០១៩នេះ បានបន្តនាំយកសត្វល្មិច ឬសត្វអណ្តើសមុទ្រចំនួន ៣ក្បាលបន្ថែមទៀត យកទៅព្រលែងចូលក្នុងសមុទ្រធម្មជាតិវិញ។
លោកឧកញ៉ាបន្តថា វាជាលើកទី១០១ហើយ ដែលរូបលោកបាននាំយកសត្វល្មិច ឬអណ្តើកសមុទ្រ ទៅព្រលែងចូលទៅក្នុងសមុទ្រ ដើម្បីអភិរក្ស។ ហើយថា អាចមានសត្វអណ្តើកសមុទ្រទាំងតូចទាំងធំរាប់ពាន់ក្បាល ត្រូវបានអភិរក្ស ឬនាំយកទៅព្រលែងចូលទៅក្នុងសមុទ្រធម្មជាតិវិញ។
លោកឧកញ៉ា ទៀ វិចិត្រ បញ្ជាក់ថា អណ្តើកសមុទ្រ ដែលរូបលោកបាននាំយកទៅព្រលែងក្នុងសមុទ្រ គឺទទួលបានពីអប្រជានេសាទ ដែលបងប្អូនអ្នកនេសាទទាំងនោះ បានចូលរួមសហការផ្តល់ជូនលោកឧញ៉ា ដើម្បីយកទៅព្រលែង ក្នុងសមុទ្រធម្មជាតិវិញ។
លោកឧកញ៉ាបន្តថា លោកបានឧបត្ថម្ភថវិកាខ្លះដល់បងប្អូនប្រជានេសាទ ដើម្បីជាការអរគុណ ដល់ពួកគាត់ ដែលបានចូលរួមសហការអភិរក្សសត្វអណ្តើកសមុទ្រជាមួយលោកជាបន្តបម្ទាប់មកនេះ។
ព្រមជាមួយគ្នានេះ លោកឧញ៉ា ទៀ វិចិត្រ ដែលមានតួនាទីជាប្រធានសមាគមទូកទេសចរណ៍ ប្រចាំខេត្តព្រះសីហនុផងនោះ ក៏បានថ្លែងអំណរគុណដល់បងប្អូនអ្នកនេសាទទាំងអស់គ្នា ដែលកន្លងមកបានសហការផ្តល់សត្វអណ្តើកសមុទ្រ ដល់រូបលោក សម្រាប់ការងារអភិរក្ស យកទៅព្រលែងក្នុងសមុទ្រធម្មជាតិវិញ។
លោកឧកញ៉ា ទៀ វិចិត្រ ឲ្យដឹងដូច្នេះ រួចបញ្ជាក់ថា នាពេលកន្លងមក ប្រជាពលរដ្ឋ ឬប្រជានេសាទសមុទ្រ ដែលនេសាទបានអណ្តើកសមុទ្រ ឬសត្វល្មិច គឺពួកគាត់ តែងបាននាំយកទៅលក់នៅប្រទេសជិតខាង និងពលរដ្ឋខ្លះទៀត បានយកទៅចំអិនធ្វើជាអាហារ សម្រាប់ទទួលទានជាដើម ប៉ុន្តែពេលនេះ គឺពួកគាត់បានងាកមកចូលរួម សហការជាមួយរូបលោក ដើម្បីអភិរក្សសត្វអណ្ដើកសមុទ្រទាំងអស់គ្នា ដោយក្រោយការនេសាទបានអណ្តើកសមុទ្រម្តងៗ គឺពួកគាត់ មិនយកទៅលក់ទៅឲ្យឈ្មួញប្រទេសជិតខាង និងមិនយកទៅចំអិនធ្វើជាអាហារទៀតទេ គឺបានយកមកប្រគល់ជូនរូបលោកទាំងអស់។
លោកឧកញ៉ា ទៀ វិចិត្រ បញ្ជាក់បន្ថែមថា ចំពោះគ្រប់សត្វអណ្តើកសមុទ្រ ដែលរូបលោក បានព្រលែងចូលទៅសមុទ្ធម្មជាតិរវិញ គឺសុទ្ធតែមានកឹបសុីល ដើម្បីចំណាំស្របតាមបច្ចេកទេសជលផលថែមទៀតផង៕ ដោយ ៖ ដែន សីមា
