ខេត្តស្វាយរៀង ៖ យុវជនម្នាក់ បានរងរបួសធ្ងន់ ដោយសារបើកបរវ៉ាជែងនិងរថយន្តដឹកកម្មកររោងចក្រ ហើយក៏ជ្រុលទៅបុករថយន្តមួយគ្រឿងទៀតចំពីមុខពេញទំហឹង ខ្ទាតទាំងម៉ូតូទាំងមនុស្សទៅចិញ្ចើមថ្នល់ផ្អើលដល់បងប្អូនប្រជាពលរដ្ឋចេញមកជួយទាំងយប់។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៧៖១០នាទីយប់ថ្ងៃទី១៧ ខែមករា ឆ្នាំ២០១៩ នៅត្រង់ចំណុចផ្លូវជាតិលេខ០១ ស្ថិតក្នុងភូមិ ថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀង។
សមត្ថកិច្ចបានឱ្យដឹងថា ជនរងគ្រោះមានឈ្មោះ មឿន បារីស ភេទប្រុស អាយុ២១ឆ្នាំ មុខរបរ កម្មករ រស់នៅភូមិប្រាសាទ ឃុំពោធិ៍រាជ ស្រុកស្វាយជ្រំ ខេត្តស្វាយរៀង រងរបួសធ្ងន់(មិនពាក់មួក) ជិះម៉ូតូម៉ាក ហុងដា សេ១២៥ ស៊េរី២០១២ ពណ៌ខ្មៅ ស្លាកលេខ ភ.ព ១l ៨៨៤៨ ។
ប្រភពដដែលបានឲ្យដឹងទៀតថា មុនពេលកើតហេតុគេឃើញយុវជនខាងលើធ្វើដំណើរពីទិសដៅកើតទៅលិចយ៉ាងលឿន មកដល់ចំណុចកើតហេតុខាងលើ បានបើកវ៉ាជែងរថយន្តដឹកកម្មករកម្មការិនីរោងចក្រ ក៏ជ្រុលទៅបុករថយន្តមកពីមុខបញ្ច្រាសទិសគ្នាពេញទំហឹង បណ្ដាលឲ្យប៉ើងទាំងម៉ូតូ ទាំងមនុស្សតែម្តង។
ប្រភពបានបន្តទៀតថា ក្រោយកើតហេតុរថយន្តមិនបានឈប់ទេ ក៏បើករត់គេចបាត់ពីកន្លែងកើតហេតុបន្សល់ទុកជនរងគ្រោះដេកស្តូកស្តឹងនៅលើថ្នល់ ត្រូវបានពលរដ្ឋ និងសមត្ថកិច្ចជួយហៅរថយន្តសង្គ្រោះដឹកបញ្ជូនទៅសម្រាកព្យាបាលនៅមន្ទីរពេទ្យខេត្តស្វាយរៀង។
ចំពោះម៉ូតូជនរងគ្រោះ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកស្វាយទាប៕ ដោយ ៖ វ៉ៃគោ