ប្រធានាធិបតីអាមេរិច ដូណាល់ ត្រាំ នៅថ្ងៃព្រហស្បតិ៍ម្សិលមិញនេះ បានធ្វើការប្តេជ្ញាបង្កើនសមត្ថភាពប្រព័ន្ធការពារមីស៊ីរបស់អាមេរិច ដោយអភិវឌ្ឍន៍បច្ចេកវិទ្យា ដើម្បីការពារប្រឆាំងទៅនឹងការគំរាមកំហែងរបស់អាវុធ និងមីស៊ីលផ្សេងៗ។
ថ្លែងនៅមន្ទីរបញ្ចាកោណម្សិលមិញ លោក ត្រាំបានបញ្ជាឲ្យមានការពិនិត្យ និងវិភាគឡើងវិញលើប្រព័ន្ធការពារមីស៊ីល ដែលបានធ្វើឡើងដើម្បីបាញ់ទម្លាក់រាល់មីស៊ីលទាំងអស់ ដែលបាញ់មក។
បញ្ហាសំខាន់ដែលត្រូវពិនិត្យមើលនោះគឺល្បឿន ដែលគូប្រជែង ចិន និងរុស្សីកំពុងតែនាំមុខ ជាមួយនឹងមីស៊ីលលឿនជាងសម្លេង ដែលអាចធ្វើឲ្យប៉ះពាល់ដល់ប្រព័ន្ធការពារ។
ត្រាំបានថ្លែងប្រាប់យោធាទាំងអស់ដូច្នេះថា “ឥឡូវនេះ អាមេរិចនឹងធ្វើការកែខៃស្ថានការណ៍ដើម្បីការពារប្រឆាំងទៅនឹងរាល់ការវាយប្រហារដោយមីស៊ីល រួមមានមីស៊ីលលឿនជាងសម្លេង”។
មីស៊ីលល្បឿនលឿនជាសម្លេង ហោះក្នុងរយៈកំពស់ទាប ហើយវាអាចផ្លាស់ប្តូរទិសដៅ និងមិនធ្វើដំណើរតាមរង្វង់ផ្លោងទេ ដូច្នេះប្រព័ន្ធការពារអាចពិបាកក្នុងការចាប់ពីគោលដៅរបស់វា និងមិនអាចស្ទាក់ចាប់បាន។ ហេតុដូចនេះហើយ ទើបមន្ទីរបញ្ចាកោណកំពុងតែស្វែងរកវិធីដើម្បីបង្កើនសមត្ថភាពក្នុងការចាប់មីស៊ីលល្បឿនលឿន ដោយប្រើប្រាស់រ៉ាដាដែលមានស្រាប់ ដែលបានបង្ហោះនៅលំហរអាកាស។
រដ្ឋមន្ត្រីការពារជាតិស្តីទី លោក Patrick Shanahan បានថ្លែងថា “បច្ចេកវិទ្យាទាំងនោះបង្កើតការគំរាមកំហែងថ្មី ហើយការគំរាមកំហែងទាំងនោះពិបាកមើលឃើញណាស់ ពិបាកចាប់ និងពិបាកយកឈ្នះណាស់”។
លោកក៏បាននិយាយទៅកាន់គូប្រជែងរបស់អាមេរិចផងដែរថា “ពួកយើងឃើញអ្នកកំពុងធ្វើអ្វី ហើយពួកយើងកំពុងចាត់វិធានការ”។ នេះជាការសំដៅទៅដល់ចិន និងរុស្សីដែលជាគូប្រជែងដ៏ខ្លាំងក្លារបស់អាមេរិច។
ការប្រកាសពីការធ្វើកំណែទម្រង់ប្រព័ន្ធការពារមីស៊ីលរបស់អាមេរិច បានកើតឡើងក្រោយពេលប្រធានាធិបតីរុស្សី វ្លាដឺមៀ ពូទីន កាលពីខែមុនបានអួតថា មីស៊ីថ្មីរបស់រុស្សី អាចហោះបាន ៣៣.០០០គីឡូម៉ែត្រក្នុងមួយម៉ោង ហើយគ្មាននរណាអាចបញ្ឍប់វាបានឡើយ៕ សុភ័ក្ត្រ
ប្រភព៖ Channelnewsasia
