រតនគិរី ៖ មន្ត្រីប៉េអឹមក្រុងបានលុងខេត្តរតនគីរីម្នាក់ បានបើករថយន្តបុកអ្នកកាសែតម្នាក់ កំពុងជិះម៉ូតូបណ្ដាលឱ្យដាច់ប្រអប់ជើងម្ខាង ខ្ទាតជាច្រើនម៉ែត្រ និងបាក់ភ្លៅទាំងពីរថែមទៀត កាលពីយប់ថ្ងៃទី១៦ ខែមករា ឆ្នាំ២០១៩។ ជនរងគ្រោះឈ្មោះអ៊ុច សាវ័ន្ដ ភេទប្រុស អាយុ២១ឆ្នាំជនជាតិខ្មែរ របរជាអ្នកយកព័ត៌ឲ្យ kH.TV ប្រចាំខេត្ដរតនគិរី។
ជនបង្កជាមន្ត្រីប៉េអឹមម្នាក់ឈ្មោះ ផន រដ្ឋា បើកចេញពីក្រុងបានលុងខេត្តរតនគីរី។ អ្នកនៅកន្លែងកើតហេតុបានឲ្យដឹងថា៖ មុនពេលកើតហេតុគេឃើញរថយន្តកាមារី (បាឡែន) ពណ៌ខ្មៅពាក់ស្លាកលេខ ភ្នំពេញ 2F.4498 បើកបរដោយមន្ត្រីប៉េអឹមម្នាក់ឈ្មោះ ផន រដ្ឋា បើកចេញពីក្រុងបានលុង ក្នុងទិសដៅពីកើតទៅលិចក្នុងយ៉ាងលឿន ខណៈពេលបើកមកដល់កន្លែងកើតហេតុ ចំណុចមុខសង្កាត់កាចាញ ក្រុងបានលុង រថយន្តនោះបានវ៉ាជាមួយរថយន្តមួយគ្រឿងផ្សេងទៀត ជ្រុលចង្កូតទៅបុកម៉ូតូអ្នកកាសែតម្នាក់ កំពុងធ្វើដំណើរបញ្ជ្រាសទិស ពីលិចទៅកើត គឺបុកពេញទំហឹង បណ្តាលឲ្យជនរងគ្រោះ ផ្លោងទាំងម៉ូតូទាំងមនុស្សធ្លាក់ពីលើផ្លូវរបួសបាក់កំភ្លៅទាំងពីរនិងដាច់ប្រអប់ជើងខាងឆ្វេងម្ខាង។
ក្រោយកើតហេតុមន្ដ្រីប៉េអឹម បើកបុកជនរងគ្រោះ បណ្ដាលឲ្យរបួសធ្ងន់ ហើយតៃកុងនោះបានដកសោ រួចចុះរត់គេចខ្លួន ដោយទុកជនរងគ្រោះចោលនៅទីនោះ។
លោក សួន សាវុធ នាយប៉ុស្តិ៍រដ្ឋបាលសង្កាត់កាចាញ បានជួយអន្តរាគមន៍ ទំនាក់ទំនងទៅក្រុមគ្រួសារជនរងគ្រោះ និងប៉ូលិសចរាចរផ្លូវគោក ឲ្យទៅដឹកជនរងគ្រោះទៅកាន់មន្ទីរពេទ្យខេត្ត ដើម្បីសង្គ្រោះបន្ទាន់ ។
មន្ដ្រីប៉ូលិសចរាចរណ៍ខេត្តរតនគិរី កាលពីរសៀលថ្ងៃទី១៧ ខែមករា ឆ្នាំ២០១៩ បានបញ្ជាក់ថា៖ ករណីគ្រោះថ្នាក់ចរាចរខាងលើ មកដល់ពេលនេះ មិនទាន់បានសន្និដ្ឋានថា ភាគីខាងខុស ឬត្រូវនៅឡើយទេ។
មន្ដ្រីប៉ូលិសបានបញ្ជាក់ថា ជនរងគ្រោះបច្ចុប្បន្ន កំពុងសម្រាកព្យាបាលនៅប្រទេសវៀតណាម៕ ដោយ៖បញ្ញាស័ក្តិ
