ភ្នំពេញ៖ អភិបាលរងរាជធានីភ្នំពេញ បានអំពាវនាវឲ្យពលរដ្ឋចូលរួម កាត់បន្ថយការ ជក់បារី ការស្រូបផ្សែងបារី នាំឲ្យគ្រោះថ្នាក់ដល់សុខភាព ធ្វើឲ្យប៉ះពាល់ដល់សុខភាពគ្រួសារ បាត់ បង់ថវិកាគ្រួសារ និងធ្វើឲ្យរបួសរូបរាងកាយ រងរបួសផ្លូវចិត្ត នៅក្នុងសង្គមជាតិ ។
ក្នុងសិក្ខាសាលាស្តីអំពីការជក់បារី នៅទីសាធារណៈ ដែលមានការចូលរួម ពីលោក អភិបាលខណ្ឌ ចៅសង្កាត់ មេភូមិ មេក្រុម និងពលរដ្ឋ ជាង២០០នាក់ មកចូលរួមស្ដាប់ពី ផល ប៉ះពាល់ គ្រោះថ្នាក់ ដោយការប្រើប្រាស់បារី នៅសាលារាជធានីភ្នំពេញ នាថ្ងៃទី១៨ ខែមករា ឆ្នាំ២០១៩នេះ ក្រោមអធិបតីភាពលោកស្រី កែវ សុពិសី អភិបាលរងរាជធានីភ្នំពេញ។
លោកស្រី កែវ សុខពិសី បានបញ្ជាក់ថា៖ ថ្នាំជក់គឺជាផលិតតែមួយគត់ ដែលធ្វើឲ្យអ្នកប្រើប្រាស់ ពាក់កណ្ដាល ស្លាប់មុនអាយុកំណត់។ ក្នុង១ឆ្នាំៗថ្នាំជក់បណ្ដាលឲ្យប្រជាពលរដ្ឋ ៨លាននាក់ស្លាប់ នៅលើពិភពលោកនិងជិត១ម៉ឺននាក់នៅកម្ពុជា។
លោកស្រីបន្តថា៖ តាមលទ្ធផល នៃការស្ទង់មតិយុវជន ពាក់ព័ន្ធទៅនឹងតម្លៃបារី នៅឆ្នាំ២០១៧ បានបង្ហាញថា យុវជនកម្ពុជា៥០% ចង់ឲ្យបារីមានតម្លៃទាប ចាប់ពី៦០០០ រៀលទៅ១ម៉ឺនរៀល និង៥០%ទៀតចង់ឲ្យបារីមានតម្លៃ១ម៉ឺនរៀលឡើងទៅ ដើម្បី ជួយកាត់បន្ថយគ្រោះថ្នាក់ បណ្ដាលមកពីការជក់បារីនេះ ។ ប៉ុន្តែទោះជាមានការដំឡើងពន្ធ លើផលលិតផលថ្នាំជក់កន្លងមកក៏ដោយ ក៏កម្ពុជាស្ថិតក្នុងចំណោមប្រទេសដែលមានអត្រាពន្ធ លើផលិតផលថ្នាំជក់ទាបបំផុតនៅក្នុងបណ្ដាប្រទេសអាស៊ានដែរ។
ដូច្នេះហើយចឹងការផលិតបារីឲ្យមានតម្លៃទាបគឺអាចឲ្យក្រុមទាំង២នេះគាត់ចាប់ផ្តើមនៅពេលគាត់ញៀនប្រើប្រាស់ដំបូងហើយគាត់អាចក្លាយជាអ្នកញៀនបាន ចឹងនៅពេលប្អូនៗសាកល្បងម៉ាដើមពីរដើមដំបូង អាចធ្វើឲ្យប្អូនញៀនក្លាយជាអ្នកប្រើប្រាស់ទាំងអស់ហើយ ។ ធ្វើមេចក្រុមហ៊ុនបារីរក្សាតំលៃឲ្យនៅទាប។
យោងតាមទឡ្ហីករណ៍របស់អង្គការសុខភាពពិភពលោក និងធនាគារពិភពលោក ការដំឡើងពន្ធលើផលិតផលថ្នាំជក់ និងធ្វើឲ្យវិធានការដ៏មានប្រសិទ្ធភាពមួយ ក្នុងការរួមចំណែកកាត់ បន្ថយហានីភ័យបណ្ដាលមកពីការប្រើប្រាស់ថ្នាំជក់និងធ្វើឲ្យកើនចំណូលពន្ធជាតិបានយ៉ាងក្រាសក្រែល។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានថ្លែងថា ការប្រើប្រាស់ថ្នាំជក់ និងការស្រូបផ្សែងថ្នាំជក់ គឺបង្កឲ្យកើតជំងឺជាច្រើនដូចជា មហារីកមាត់ មហារីកសួត មហារីកបំពង់ក រលាកផ្លូវដង្ហើមធ្ងន់ធ្ងរ ដាច់សរសៃឈាមខួរក្បាល រលូតកូនជាដើមគ្រោះថ្នាក់ទាំងនេះបានធ្វើឲ្យមានពលរដ្ឋកម្ពុជា១ម៉ឺននាក់ត្រូវបានស្លាប់ក្នុង១ឆ្នាំៗ។ ដើម្បីឲ្យពលរដ្ឋកម្ពុជា យល់ដឹងបានច្បាស់អំពីគ្រោះថ្នាក់ក៏ដូចជាភាពជាក់ស្ដែងនៃជំងឺដែលកើតឡើងដោយសារការប្រើប្រាស់ថ្នាំជក់នេះ រាជរដ្ឋាភិបាលបានអនុម័តនូវអនុក្រឹត្យ ស្ដីពីការ បោះពុម្ពសារព្រមានសុខភាពជាភាសាខ្មែរ និងជារូបភាពលើកញ្ចប់ផលិតផលថ្នាំជក់ ។
សូមបញ្ជាក់ថា បច្ចុប្បន្ននៅលើពិភពលោក មានអ្នកស្លាប់ដោយសារផលិតផលថ្នាំជក់ចំនួន៦លាននាក់ក្នុង១ឆ្នាំ ដោយឡែកកម្ពុជាមាន១ម៉ឺននាក់ក្នុង១ឆ្នាំ បើគិតជាមធ្យមមាន៣០នាក់បានស្លាប់ក្នុង១ថ្ងៃ ។ បើតាមការស្រាវជ្រាវរបស់មន្ទីរពេទ្យមិត្តភាពខ្មែរ-សូវៀត បានបញ្ជាក់ថា អ្នកដែលមានជំងឺដោយសារប្រើប្រាស់ផលិតផលថ្នាំជក់ត្រូវចំណាយថវិកា ១ម៉ឺនដុល្លារសម្រាប់ព្យាបាល។
លោកវេជ្ជបណ្ឌិតមុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានស្នើឲ្យអាជ្ញាធរមូលដ្ឋានអន្តរាគមន៍លុបបំបាត់ការប្រើប្រាស់ផលិតផលថ្នាំជក់តាមរយៈអញ្ជើញម្ចាស់សណ្ឋាគារ ភោជនីយដ្ឋាន និងកន្លែងអាជីវកម្មនានាដើម្បីផ្សព្វ ផ្សាយពីច្បាប់ និងអនុក្រឹត្យស្តីពីការហាមជក់បារី ដោយតម្រូវឲ្យបិទស្លាកសញ្ញាហាមជក់បារីនៅតាមកន្លែងអាជីវកម្ម ដើម្បីឲ្យពួកគេបន្តអប់រំណែនាំដល់ភ្ញៀវសំដៅលុបបំបាត់ផ្សែងបារី។
ការជំរុញឲ្យអាជ្ញាធរមូលដ្ឋានចូលរួមអន្តរាគមន៍លុបបំបាត់ការការប្រើប្រាស់ផលិតផលថ្នាំជក់នេះ ដោយសាតែអង្គការសុខភាពពិភពលោករកឃើញថា ប្រជាពលរដ្ឋកម្ពុជាប្រមាណជិត១ម៉ឺននាក់ស្លាប់ជារៀងរាល់ឆ្នាំដោយសារជំងឺពាក់ព័ន្ធដែលបណ្តាលមកពីការជក់បារីដូចជា ជំងឺពាក់ព័ន្ទទៅនឹង មហារីក ដាច់សរសៃឈាមខួរក្បាល បេះដូងនិងជំងឺនៅកន្លែងប្រដាប់រំលាយអាហារជាដើម។
អ្នកចូលរួមក្នុងកម្មវិធីនេះ បានលើកឡើងថា ខ្ញុំគិតថាការជក់បារី ដូចជាគ្មានអ្វីជាផលល្អសោះ វាអាចធ្វើអោយអ្នកជក់កើតជំងឺមហារីកសួត មិនមែនប៉ះពាល់ត្រឹមតែអ្នកជក់ទេវាអាចប៉ះពាល់ដល់អ្នកដែលនៅជុំវិញអ្នកជក់នឹងទៀត ហើយការជក់បារីនេះគឺដូចជាចំណាយលុយទៅទិញជំងឺមកដាក់ក្នុងខ្លួនចឹង ចុះបើយើងយកលុយនោះមកទិញដូចជាភេសជ្ជៈទៅពិសារវិញតើវាមិនល្អទេឬ? ខ្ញុំក៏សូមអភយ័ទោសបងប្អូននិងមិត្តៗដែលចូលចិត្តជក់បារីផងដែរ បើខ្ញុំនិយាយទៅមានប៉ះពាល់ដល់អារម្មណ៍បងប្អូននោះខ្ញុំសុំទោសផង៕ ដោយ ៖ កូឡាប