ភរិយារបស់លោក Meng Hongwei ដែលជាប្រធានស្ថាប័នប៉ូលិសអន្តរជាតិ (អាំងទែប៉ូល) បានស្វែងរកសិទ្ធិជ្រកកោនក្នុងប្រទេសបារាំងសម្រាប់អ្នកស្រីខ្លួនឯង និងកូនភ្លោះ ២នាក់។
អ្នកស្រី Grace Meng និងកូនភ្លោះអាយុ ៧ឆ្នាំរបស់អ្នកស្រីបច្ចុប្បន្នកំពុងរស់នៅក្នុងទីក្រុងលីយ៉ុង ប្រទេសបាំរាង ដែលជាទីស្នាក់ការធំរបស់ប៉ូលីសអន្តរជាតិ។ អ្នកស្រីកំពុងស្វែងរកសិទ្ធិជ្រកកោនជាអចិន្ត្រៃយ៍នៅទីនោះ បន្ទាប់ពីប្តីអ្នកស្រី បានបាត់ខ្លួន កំឡុងពេលធ្វើដំណើរទៅកាន់ប្រទេសចិន។
កាលពីខែតុលា អាជ្ញាធរចិនបាននិយាយថា លោក Meng Hongwei ត្រូវបានប៉ូលីសធ្វើការស៊ើបអង្កេតពីបទទទួលយកសំណូក។
ភរិយា និងកូនរបស់លោក កំពុងស្ថិតក្រោមការការពាររបស់ប៉ូលីស ក្រោយពេលទទួលបានការគំរាមកំហែង។
អ្នកស្រីត្រូវបានវិទ្យុបារាំងដកស្រង់សំដីថា “ខ្ញុំមានការភ័យខ្លាចថា ពួកគេនឹងចាប់ជំរិតខ្ញុំ”។
“ខ្ញុំទទួលបានការតេចូលចម្លែកៗ ហើយសូម្បីឡានរបស់ខ្ញុំក៏រងការកំទិចដែរ។ បុរស និងស្ត្រីចិន ២នាក់បានតាមខ្ញុំមកសណ្ឋាការ”។
នៅថ្ងៃប្តីអ្នកស្រីបាត់ខ្លួន អ្នកស្រីបញ្ជាក់ថា ប្តីអ្នកស្រីបានផ្ញើសារទៅកាន់ប្រអប់សារក្នុងបណ្តាញសង្គមដោយប្រាប់គាត់អោយរងចាំការតេរបស់គាត់ មុនពេលគាត់ផ្ញើរូបកាំបិតមក ដែលវាជាសញ្ញាបញ្ជាក់ពីគ្រោះថ្នាក់៕ សុភ័ក្ត្រ
ប្រភព៖ BBC