ខេត្តស្វាយរៀង ៖ កណ្តៀងជាបន្លែមួយប្រភេទដែលមានពណ៌បៃតង និងមានរស់ជាតិល្វីងតិចៗ មិនចាញ់ប្រម៉ាត់ដីឡើយ ហើយត្រូវបានអ្នកខេត្តស្វាយរៀងពេញនិយមជាខ្លាំងតាំងតែពីសម័យដើមមកម្ល៉េះ សម្រាប់យកទៅធ្វើជាបន្លែស្លទទួលទាន ឬជាអន្លក់ទឹកគ្រឿង អន្លក់ផ្គាប់ជាមួយប្រហុកផ្អកជាដើម ជាពិសេសគឺសម្លរកកូរតែម្តង(កកូរកណ្តៀង) ។
រុក្ខជាតិកណ្តៀងនេះភាគច្រើនគេឃើញមានដុះនៅតាមភូមិដ្ឋានរបស់ប្រជាពលរដ្ឋស្ទើរតែគ្រប់ទីកន្លែនៅក្នុងប្រទេសកម្ពុជា និងដុះចម្រុះជាមួយនឹងបន្លែគួបផ្សំជាច្រើនមុខដែលប្រជាកសិករដាំក្នុងត្រែងសម្រាប់ផ្គត់ផ្គង់លក់លើទីផ្សារផងដែរ។
បច្ចុប្បន្នមានការកត់សម្គាល់ឃើញថា នៅតាមភោជនីយដ្ឋាននានាក្នុងខេត្តស្វាយរៀង បន្លែកណ្ដៀងមានការពេញនិយមជាខ្លាំង ហើយពេលភ្ញៀវចូលទទួលទានអាហារនៅតាមភោជនីយដ្ឋានម្តងៗតែងតែកម្មង់មុខម្ហូបដែលស្លពីកណ្តៀង ឬអន្លក់កណ្តៀងជាប់ជាប្រចាំ។
ដោយហេតុថា កណ្តៀងកំពុងពេញនិយមសម្រាប់អ្នកស្រុក និងភ្ញៀវទេសចរជាតិ អន្តរជាតិ ដែលឆ្លងកាត់ទឹកដីខេត្តស្វាយរៀង ក្នុងការធ្វើជាបន្លែទទួលទានដ៏ឆ្ងាញ់ពិសារនេះហើយ ទើបគេសង្កេតឃើញប្រជាពលរដ្ឋអ្នកខេត្តស្វាយរៀងមួយចំនួននាំគ្នាងាកមកប្រកបរបរដាំកណ្តៀងសម្រាប់ចែកចាយលក់នៅលើទីផ្សារនានាក្នុងនិងក្រៅខេត្តផងដែរ៕ ដោយ ៖ វ៉ៃគោ
