ព្រះសង្ឃព្រពុទ្ធសាសនាថៃចំនួន ២អង្គបានសុគត និង ២អង្គផ្សេងទៀតរងរបួស នៅក្នុងការបាញ់ប្រហារក្នុងវត្ត ស្ថិតនៅភាគខាងត្បូងប្រទេសថៃ។ នេះបើតាមការចុះផ្សាយរបស់ BBC ។
បើតាមសាក្សីបានឲ្យដឹងថា ពួកគេបានឃើញខ្មាន់កាំភ្លើងស្លៀកពាក់ពណ៌ខ្មៅ ជិះម៉ូតូ និងបានសម្រុកចូលវត្ត Rattanaupap ហើយបានធ្វើការបាញ់ប្រហារព្រះសង្ឃជាច្រើនអង្គ ក្នុងរយៈចំងាយជិត។
រហូតមកដល់ពេលនេះ មិនទាន់មានក្រុមណាមួយចេញមុខអះអាងពីទំនួលខុសត្រូវរបស់ពួកគេនៅឡើយទេ។ ហេតុការណ៍បាញ់ប្រហារនោះស្ថិតនៅក្នុងខេត្ត Narathiwat ជាប់នឹងព្រំដែនប្រទេសម៉ាឡេស៊ី ដែលរងអំពើហឹង្សាដោយសារក្រុមប៉ះបោរអស់រយៈពេលជាច្រើនឆ្នាំមកហើយ។
ក្រុមប៉ះបោរកាន់សាសនាអ៊ីស្លាមនៅទីនោះ បានធ្វើការវាយប្រហារទៅលើខេត្ត Narathiwat ដែលមានអ្នកកាន់សាសនាព្រះពុទ្ធភាគច្រើន។
មនុស្សចំនួន ៧.០០០នាក់ ដែលភាគច្រើនជាជនស៊ីវិល ត្រូវបានសម្លាប់នៅក្នុងការវាយប្រហារដោយក្រុមប៉ះបោរអ៊ីស្លាម តាំងពីឆ្នាំ ២០០៤មក។
អំពើហឹង្សានៅក្នុងតំបន់ បានបណ្តាលឲ្យព្រះសង្ឃចំនួន ២៣អង្គសុគតចាប់ទាំងពីមានអំពើហឹង្សាមក។ នេះបើតាមក្រុមយុទ្ធនាការរបស់អង្គការ Human Rights Watch។
មេដឹកនាំសាសនាអ៊ីស្លាម និងព្រះពុទ្ធបានថ្កោលទោសចំពោះការវាយប្រហារនោះ។
ចំណែកនាយករដ្ឋមន្ត្រីថៃ ប្រាយុទ្ធ ចាន់អូចា បាននិយាយថា ការបាញ់ប្រហារនោះគឺជាសកម្មភាពយង់ខ្នង ហើយលោកប្តេជ្ញាថានឹងដាក់ទោសទៅដល់អ្នកប្រព្រឹត្ត៕ សុភ័ក្ត្រ
ប្រភព៖ BBC