បុរសវ័យចំណាស់បំផុតរបស់ពិភពលោក ឈ្មោះ Masazo Nonaka បានទទួលមរណៈភាពកាលពីថ្ងៃអាទិត្យម្សិលមិញនេះ នៅអាយុ ១១៣ឆ្នាំ។
លោកត្រូវបានស្ថាប័នឯកទក្តកម្ម Guinness World Records ទទួលស្គាល់នៅខែមេសា ឆ្នាំ ២០១៨ជាបុរសចាស់ជាងគេអង្អស់ក្នុងពិភពលោក។ នេះបើតាមការផ្សព្វផ្សាយរបស់ សារពត៌មានជប៉ុន NHK។
លោកតា Masazo Nonaka ដែលមានដើមកំណើតនៅកោះ Hokkaido បានកើតនៅថ្ងៃទី ២៥ ខែកក្កដា ឆ្នាំ ១៩០៥។
គ្រួសាររបស់លោកតា កាលពីថ្ងៃអាទិត្យម្សិលមិញនេះ បានសម្គាល់ឃើញថា លោកតាលែងដកដង្ហើម។ វេជ្ជបណ្ឌិតរបស់គាត់បានបញ្ជាក់ថា គាត់បានស្លាប់បាត់ទៅហើយ។ គ្រួសារគាត់បញ្ជាក់ថា គាត់ហាក់មានសភាពធម្មតាសោះនៅថ្ងៃសៅរ៍ ។
ស្ថាប័នឯកទក្តកម្ម Guinness World Records បានដាក់លោកតា ជាបុរសចំណាស់បំផុតក្នុងលោក កាលពីខែមេសា ឆ្នាំ ២០១៨ នៅពេលលោកតាមានអាយុ ១១២ឆ្នាំ និង ២៥៩ថ្ងៃ។ គាត់បានចំណាយពេលដែលនៅសេសសល់ អានកាសែត ហូបបង្អែម និងនំ ព្រមទាំងមើលទូរទស្សន៍ ជាពិសេសកីឡាសូម៉ូ។
លោកតាធ្លាប់បាននិយាយថា គាត់ជឿជាក់ថា កាលដែលគាត់មានអាយុវែងបែបនេះ គឺអាចដោយសារតែគាត់ចូលចិត្តត្រាំទឹកក្តៅ និងហូបបង្អែម ប៉ុន្តែកូនស្រីរបស់គាត់និយាយថា អាចមានរឿងច្រើនដែលដែលត្រូវធ្វើ ដើម្បីរស់នៅបានយូរបែបនោះ៕ សុភ័ក្ត្រ
ប្រភព៖ CNN