កំពង់ចាម ៖ ទឹកទន្លេមេគង្គលើបានហក់ឡើងជាង០,៥០ម៉ែត្រ ខុសពីកម្ពស់ធម្មតា ធ្វើឲ្យស្ពានប្រដឹសឫស្សីកោះប៉ែន របើកដាច់ដោយកង់ បន្ទាប់ពីមានភ្លៀងធ្លាក់នៅក្នុងប្រទេសឡាវ ដល់កម្រិតជាង៤០មិលី្លម៉ែត្រ និងធ្វើឲ្យទឹកទន្លេ នៅក្នុងប្រទេសនេះ ហក់ឡើងខ្ពស់ជាងកម្ពស់ទឹកធម្មតា ប្រមាណជា២,៦០ម៉ែត្រ។
បើតាមការផ្សាយរបស់រដ្ឋបាលខេត្តកំពង់ចាម នារសៀលថ្ងៃទី២១ ខែមករា ឆ្នាំ ២០១៩ លោកគួច ចំរើន អភិបាល នៃគណៈអភិបាលខេត្តកំពង់ចាម បានអញ្ជើញទៅពិនិត្យមើលស្ពានឫស្សី កោះប៉ែន ដែលកំពុងរងការគំរាមកំហែង ដោយសារការកើនឡើងទឹកទន្លេមេគង្គ ដែលបណ្ដាលមកពីនៅភាគខាងលិច ប្រទេសចិន ទទួលរងគ្រោះដោយទឹកភ្លៀង ទើបបណ្ដាលឲ្យចរន្តទឹកទន្លេមេគង្គ មានការកើនឡើងគួរឲ្យកត់សម្គាល់ ការកើនឡើងនេះ តាមរបាយការណ៍របស់មន្ទីរធនធានទឹកនិងឧតុនិយមខេត្តកំពង់ចាម បានឲ្យដឹងថា មានរយៈពេលប្រមាណជាមួយសប្តាហ៍ នឹងអាចស្រកទៅវិញ។
ក្នុងឱកាសនោះដែរ លោក គួច ចំរើន ក៏បានបញ្ជាក់ផងដែរថា ថ្វីដ្បិតតែ ទឹកទន្លេមេគង្គ កើនឡើងដែលធ្វើឱ្យប៉ះពាល់ ទៅដល់ស្ពានឫស្សីនេះ ក៏ពិតមែន តែលោកក៏បានបញ្ជាឲ្យអ្នកជំនាញ ការជួសជុលស្ពាននេះឡើងវិញ ដើម្បីឲ្យទាន់ស្របពេលពិធីបុណ្យចូលឆ្នាំចិន នាពេលខាងមុខនេះ ដែលអាចឲ្យបងប្អូនប្រជាពលរដ្ឋ អ្នកទេសចរណ៍ជាតិ និងអន្តរជាតិ បានមកមើល ឆ្លងកាត់ និងធ្វើដំណើរកម្សាន្តទៅលេងឆ្នេរកោះប៉ែន ។ ទោះជាការហក់ឡើង នៃទឹកទន្លេមេគង្គនេះ ឡើងខ្ពស់បន្ទិចមែន តែមិនអាចធ្វើឲ្យប៉ះពាល់ដល់ការប្រកបរបបចិញ្ចឹមជីវិត របស់បងប្អូននៅតាមដងទន្លេនោះទេ។
លោកក៏បានផ្តាំផ្ញើដល់ក្រុមអ្នកជួសជុលស្ពានឫស្សីនេះ ត្រូវខិតខំធ្វើ ឲ្យហើយដោយយកចិត្តទុកដាក់ខ្ពស់ ពីសុខសុវត្ថិភពជាចម្បងផងដែរ។
លោកអភិបាលខេត្តកំពង់ចាម បានប្រាប់ឲ្យដឹងថា ទឹកទន្លេមេគង្គហក់ឡើងខុសប្រក្រតី បានធ្វើឲ្យស្ពានប្រដឹសឫស្សីសម្រាប់អ្នទេសចរណ៍ ឆ្លងពីក្រុងកំពង់ចាមទៅឆ្នេរខ្សាច់កោះប៉ែនដាច់ ខូចអស់ប្រវែងប្រមាណជា១០០ម៉ែត្រ បន្ទាប់ពីទឹកទន្លេបានឡើងជាលំដាប់ ប្រហែលមួយសប្តាហ៍ សរុបទឹកឡើងប្រហែល០,៨០ម៉ែត្រ ធ្វើឲ្យលិចស្ពាននៅកន្លែងខ្លះមុននឹងវៀចដាច់។
ពាក់ពន្ធ័ទៅនឹងការជន់ឡើងខុសប្រក្រតីនៃទឹកទន្លេមេគង្គនេះ លោកម៉ៅ ហាក់ ជាអគ្គនាយករងបច្ចេក ទេសរួមជាមួយ លោកយិន សាវុធ ប្រធាននាយកដ្ឋានជលសាស្ត្រ បានប្រាប់ឲ្យដឹង នៅថ្ងៃទី២១ខែមករាឆ្នាំ២០១៩ថា ទឹកទន្លេមេគង្គនៅខេត្តកំពង់ចាម ហក់ឡើងខ្ពស់ជាងពេលធម្មតា ប្រមាណជាកន្លះមែត្រមិនមែនដោយ សារការបើកទ្វារទឹក របស់វារីអគ្គិសនី ណាមួយនៅកម្ពុជាទេ គឺដោយសារមានភ្លៀងធ្លាក់ ដល់កម្រិត៤៣មិលី្លម៉ែត្រ នៅក្នុងប្រទេសឡាវ។ ភ្លៀងនេះបានធ្វើឲ្យទឹកទន្លេស្ថានីយ៍លួងប្របាង ឡើងខ្ពស់ជាងធម្មតា ដល់ទៅ២,៦០ម៉ែត្រ កាលពីជាមួយសប្តាហ៍មុន។ ទឹកនៅខេត្តកំពង់ចាមអាចឡើងថែមបន្តិចទៀត មុនស្រកទៅវិញ។ ថ្ងៃនេះទឹកមានកម្ពស់ ៤,៥៥ម៉ែត្រ ៕ ដោយ ៖ កូឡាប
