លោកហេង រតនា បានឲ្យដឹងថា តាមពិត បងប្អូនប្រជានេសាទត្រី យកគ្រាប់កាំភ្លើងធំ ១០៥មីលីមែត្ររហូតដល់១៥៥មីលីមែត្រ ទៅចងជើងអួនយកទំងន់សង្កត់ជើងអួន ដល់បាតទឹក ចាប់ត្រីដល់ក្នុងភក់។
សំណល់គ្រាប់មិនទាន់ផ្ទុះ ប្រភេទគ្រាប់កាំភ្លើងធំ១០៥មីលីម៉ែត្រ បានផ្ទុះនៅភូមិព្រៃតូច ឃុំជីរ៉ូទី១ ស្រុកត្បូងឃ្មុំ ខេត្តត្បូងឃ្មុំ បានសម្លាប់ប្រជាជនម្នាក់និងបង្ករបួសចំនួន៩នាក់ កាលពីថ្ងៃទី១៤ មករា ២០១៩។ នេះជាមរតកសំណល់សង្គ្រាម និងសូមអំពាវនាវសូមបងប្អូនទាំងអស់ហាមប៉ះពាល់និងកែឆ្នៃគ្រាប់មិនទាន់ផ្ទុះគ្រប់ប្រភេទ បើឃើញគ្រាប់សំណល់ជាតិផ្ទុះពីសង្គ្រាមសូមទាក់ទងកំលាំងសមត្ថកិច្ច ដើម្បីការពារសុវតិ្ថភាព ។
លោកហេង រតនា អគ្គនាយកស៊ីម៉ាក់ នៅថ្ងៃទី២២មករានេះ បានឲ្យដឹងថា “ចាប់ចងខ្មាំងមួយគូហ្នង! តាមពិតបងប្អូនប្រជានេសាទត្រី យកគ្រាប់កាំភ្លើងធំ ១០៥មីលីមែត្ររហូតដល់១៥៥មីលីមែត្រ ទៅចងជើងអួនយកទំងន់សង្កត់ជើងអួនដល់បាតទឹកចាប់ត្រីដល់ក្នុងភក់ឯណោះ! ករណីបែបនេះហើយ ទើបពួកគាត់ឆ្នៃគ្រាប់ដោយស្លសំណរចាក់បន្ថែមទំងន់ក៏ផ្ទុះស្លាប់និងរងរបួសកាលកន្លងទៅថ្មីៗនេះ។ គ្រាប់នេះប្រជាពលរដ្ឋប្រគល់ឲ្យប៉ូលីស្ថិតនៅក្នុងភូមិព្រៃតូច ឃុំជីរោទ៍១ ស្រុកត្បូងឃ្មុំ ខេត្តត្បូងឃ្មុំ ។ សូមអំពាវនាវដល់បងប្អូនប្រជានេសាទបញ្ឈប់នូវទង្វើនេះ និងសុំប្រគល់គ្រាប់មិនទាន់ផ្ទុះទាំងនោះមកនគរបាលប៉ុស្តនៅមូលដ្ឋានឬទំនាក់ទំនងមកអង្គភាពស៊ីម៉ាក់ដែលឈរជើងក្បែរៗនោះ”។
ករណីនេះលោក ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនតំណាងដ៏ខ្ពង់ខ្ពស់សម្តេចតេជោនាយករដ្ឋមន្ត្រី និងជាប្រធានអាជ្ញាធរមីន បានចុះសាកសួរសុខទុក្ខ និងផ្តល់គ្រឿងឧបភោគបរិភោគ និងថវិកាមួយចំនួនដែលជាអំណោយដ៏ថ្លៃថ្លារបស់សម្តេចតេជោនាយករដ្ឋមន្ត្រី ដល់ជនរងគ្រោះដោយសារផ្ទុះក្បាលគ្រាប់ ១០៥មីលីម៉ែត្រ កាលពីព្រឹកថ្ងៃទី១៤ ខែមករា ឆ្នាំ២០១៩ វេលាម៉ោង ០៨និង៣០នាទីព្រឹក នៅចំនុចភូមិព្រែកតូច ឃុំជីរោទ៌ទី១ ស្រុកត្បូងឃ្មុំ ខេត្តត្បូងឃ្មុំ ដែលឧបទ្ទវហេតុខាងលើបានបណ្តាលឲ្យប្រជាពលរដ្ឋ១នាក់ស្លាប់ និង៩នាក់រងរបួស ដែលកំពុងសម្រាកព្យាបាលនៅមន្ទីរពេទ្យបង្អែកខេត្តកំពង់ចាម ៕ ដោយ ៖ កូឡាប