ខេត្តព្រះសីហនុ ៖ មន្ត្រីរដ្ឋបាលសាលាខេត្តព្រះសីហនុ បានឱ្យដឹងថា កាលពីព្រឹកថ្ងៃទី២២ ខែមករា ឆ្នាំ២០១៩នេះ គណៈប្រតិភូទីក្រុងឈីងតាវ មួយក្រុម ដឹកនាំដោយ លោក លួយ ជៀនជុន អភិបាលរងក្រុងឈីវតាវ នៃសាធារណៈរដ្ឋប្រជាមានិតចិន បានចូលជួបសំដែងការគួរសម ជាមួយឯកឧត្តម យន្ត មីន អភិបាលខេត្តព្រះសីហនុ ក្នុងគោលបំណងពង្រឹងកិច្ចសហប្រតិបត្តិការ រវាងខេត្តឈីងតាវ និងខេត្តព្រះសីហនុ លើវិស័យសេដ្ឋកិច្ច ពាណិជ្ជកម្ម វិទ្យាសាស្ត្រអប់រំ និងទេសចរណ៍ ព្រមទាំងការអភិវឌ្ឍសេដ្ឋកិច្ចខៀវ កំពង់ផែ និងទេសចរណ៍ឲ្យកាន់តែប្រសើរឡើងថែមទៀត។
នាឱកាសនោះដែរ ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ បានលើកឡើងពីសក្តានុពល របស់ខេត្តព្រះសីហនុ មានដូចជា៖ កំពង់ផែអន្តរជាតិក្រុងព្រះសីហនុ មានវិសាលភាពធំទូលាយ សម្រាប់តភ្ជាប់ការដឹក ជញ្ជូនតាមផ្លូវសមុទ្រជាលក្ខណៈជាតិ អន្តរជាតិ បម្រើទំនិញជាកុងតឺន័រចេញ-ចូលប្រមាណជិត ៧៣ភាគរយ នៃបរិមាណទំនិញនាំចេញ នាំចូលទូទាំងប្រទេស។ ខេត្តព្រះសីហនុ មានព្រលានយន្តហោះអន្តរជាតិ មួយ ដោយបានដើរតួនាទីយ៉ាងសំខាន់ ក្នុងការដឹកជញ្ជូនអ្នកដំណើរជាតិ និងអន្តរជាតិមកទស្សនា និងវិនិយោគនៅខេត្តព្រះសីហនុ។ ហើយថា បច្ចុប្បន្នព្រលានយន្តហោះប្រតិបត្តិការដោយក្រុមហ៊ុនអាកាសចរណ៍ចំនួន ១១ក្រុមហ៊ុន ក្នុងនោះមានជើងហោះហើរក្នុងស្រុក មាន៨៣ជើង ក្នុងមួយសប្តាហ៍ និងក្រៅស្រុក ៦១ជើង ក្នុងមួយសប្តាហ៍។
ឯកឧត្តម យន្ត មីន ឲ្យដឹងដូច្នេះរួចបញ្ជាក់ថា ចំពោះគោលដៅហោះហើរត្រង់ពីខេត្ត-ក្រុងប្រទេសចិន ឆ្ពោះមកកាន់ខេត្តព្រះសីហនុមាន ១៦ខេត្ត-ក្រុង។
ឯកឧត្តមបន្តថា ខេត្តព្រះសីហនុ មានតំបន់សេដ្ឋកិច្ចពិសេសចំនួន៤កន្លែង កំពុងដំណើរការមានរោងចក្រតូច-ធំសរុប ១៦០កន្លែង និងសិប្បកម្ម ១០៣៧កន្លែង ដោយបានស្រូបយកកម្លាំងពលកម្មសរុប ៦៨.៣៥៤នាក់។ ក្នុងនោះភ្ញៀវទេសចរ ជាមធ្យមមានការកើនឡើងពី ១០ ទៅ ១៥ភាគរយ ក្នុងមួយឆ្នាំៗ។ ជាពិសេសភ្ញៀវទេសចរចិន ស្ថិតក្នុងលំដាប់លេខមួយ ដែលមានចំនួន ២០២.៩៤៧នាក់ កើនឡើង ៦៨.៧៩ភាគរយ។
បច្ចុប្បន្នមានអ្នកវិនិយោគចិន ចូលមកប្រកបមុខរបរផ្សេងៗ ក្នុងខេត្តព្រះសីហនុ ស្ថិតក្នុងលំដាប់លេខ១ ដែលមករកស៊ី និងវិនិយោគច្រើនក្នុងវិស័យឧស្សាហកម្ម ពាណិជ្ជកម្ម ដឹកជញ្ជូន សំណង់ និងទេសចរណ៍។
ផ្តើមពីបញ្ហានេះ ឯកឧត្តម យន្ត មីន ថ្លែងក្នុងនាមអាជ្ញាធរដែនដី នៃរដ្ឋបាលបាលខេត្តព្រះសីហនុ សូមគាំទ្រអ្នកវិនិយោគចិន ដែលអនុវត្តតាមគោលនយោបាយផ្លូវមួយ ខ្សែក្រវ៉ាត់មួយ របស់ប្រធានាធិបតីចិន ធ្វើឱ្យខេត្តព្រះ សីហនុ មានការអភិវឌ្ឍលឿនយ៉ាងគំហុក។
ព្រមជាមួយគ្នានេះ ឯកឧត្តម យន្ត មីន អភិបាលខេត្តព្រះសីហនុ ក៏បានសំណូមពរដល់គណៈប្រតិភូចិន ឱ្យបន្តជួយផ្សព្វផ្សាយពីសក្តានុពល របស់ខេត្តព្រះសីហនុ និងជួយជម្រុញអ្នកវិនិយោគចិន ឱ្យចូលមកកាន់ខេត្តព្រះសីហនុ ឱ្យបានច្រើនថែមទៀត។
នៅក្នុងជំនួបនោះដែរ លោក លួយ ជៀនជុន អភិបាលរងក្រុងឈីងតាវ បានថ្លែងអំណរគុណដល់រដ្ឋបាលខេត្តព្រះសីហនុ ខេត្តឈីងតាវ និងខេត្តព្រះសីហនុ បង្កើតឱ្យមានកិច្ចសហប្រតិបត្តិការរីកជាមួយគ្នាកាន់តែរីកចម្រើននៅពេលនេះ។
គណៈប្រតិភូខេត្តឈីងតាវ បន្តថា កន្លងមកនេះ ខេត្តឈីងតាវ ក៏ធ្លាប់បានទទួលស្វាគមន៍ដំណើរទស្សនកិច្ច របស់សម្ដេចរដ្ឋនកោដ នរោត្តមសីហនុ ចំនួន២ដង គឺនៅឆ្នាំ១៩៧២ និងឆ្នាំ១៩៨១។
លោក លួយ ជៀនជុន អភិបាលរងក្រុងឈីងតាវ បានបន្តថា ខេត្តឈីងតាវ មានវិស័យដឹកជញ្ជូនតាមផ្លូវសមុទ្រលំដាប់ទី៧ ហើយលោកសង្ឃឹមថា កំពង់ផែឈាងតាវ និងកំពង់ផែក្រុងព្រះសីហនុ និងសហការគ្ នាក្នុងការដឹកជញ្ជូនកាន់តែប្រសើរឡើងថែមទៀត។
លោកបន្តថា ក្នុងឆ្នាំ២០១៨ ទីក្រុងឈីងតាវ ទទួលបានភ្ញៀវទេសចរ ១០០លាននាក់។ ផ្តើមពីបញ្ហានេះហើយលោកសង្ឃឹមថា ទីក្រុងឈីងតាវ និងទីក្រុងព្រះសីហនុ នឹងបន្តកិច្ចសហការលើវិស័យទេសចរណ៍ ឲ្យកាន់តែល្អថែមទៀត។
ទន្ទឹមគ្នានេះ លោក លួយ ជៀនជុន អភិបាលរងក្រុងឈីងតាវ ក៏បានសំណូមពរដល់ ឯកឧត្តម យន្ត មីន អភិបាលខេត្តព្រះសីហនុ ស្នើឲ្យដឹកនាំគណៈប្រតិភូខេត្តនេះ ចេញទៅចូលរួមរដូវកាលស្រាបៀរ នៅខេត្តឈឺងតាវ និងបានភ្លក់រសជាតិស្រាថ្មីៗ ដើម្បីបង្កើនទំនាក់ទំនង និងកិច្ចសហប្រតិបត្តិការ រវាងខេត្តទាំងពីរ ឲ្យកាន់តែជិតស្និតថែមទៀតនាថ្ងៃខាងមុខ៕ ដោយ ៖ ដែន សីមា