ខេត្តព្រះសីហនុ ៖ មន្ត្រីនគរបាលអន្តោប្រវេសន៍ ច្រកទ្វារកំពង់ផែអន្តរជាតិខេត្តព្រះសីហនុ បានឲ្យដឹងថា ព្រឹកថ្ងៃទី២២ ខែមករា ឆ្នាំ២០១៩ វេលាម៉ោង៦ និង៤៥នាទី នាកំពង់ផែក្រុងព្រះសីហនុ មាននាវាទេសចរណ៍ខ្នាតធំមួយគ្រឿងឈ្មោះ Wisterdem បានដឹកភ្ញៀវទេសចរចម្រុះជាតិសាសន៍ជិត២ពាន់នាក់ចូលមកទស្សនាប្រទេសកម្ពុជា ជាពិសេសទស្សនាខេត្តព្រះសីហនុ។
មន្ត្រីនគរបាលដដែលឱ្យដឹងថា នាវាទេសចរណ៍ខាងលើនេះ មានសញ្ជាត្តិ Noterland មាននាវឹកចំនួន៧៨៨នាក់ ស្រី១២៤នាក់ និងមាន៤០សញ្ជាតិ។
នាវាទេសចរណ៍នេះ បាននាំភ្ញៀវទេសចរចំរុះជាតិសាសន៍ ចំនួន ៤៣សញ្ជាតិ និងមានចំនួនសរុប ១៨៦៤នាក់ ក្នុងនោះស្រី ៩៩៧នាក់។
នៅក្នុងនាវានោះ មានភ្ញៀវទេសចរសញ្ជាតិអង់គ្លេសចំនួន ២១០នាក់។ សញ្ជាតិអាមេរិចចំនួន ៩១១នាក់។ សញ្ជាតិកាណាដាមានចំនួន ៣១២នាក់ ក្រៅពីនោះសញ្ជាតិផ្សេងៗ។
នាវាទេសចរណ៍ឈ្មោះ Wisterdem ខាងលើនេះ មានបណ្តោយប្រវែង ២៨៥,២២ម៉ែត្រ និងទទឹងប្រវែង ៣២,៣៥ម៉ែត្រ។
ចំណែកភ្ញៀវចូលក្នុងប្រទេសកម្ពុជា ហើយចេញតាមសៀមរាប ៤៧នាក់ ស្រី១៨នាក់ មាន៤សញ្ជាតិ។ ហើយភ្ញៀវមកពីសៀមរាប ចេញតាមនាវាទេសចរណ៍ខាងលើនេះ មានចំនួន៤នាក់ ស្រី៣នាក់។
មន្ត្រីនគរបាលអន្តោប្រវេសន៍ច្រកទ្វារ កំពង់ផែអន្តរជាតិខេត្តព្រះសីហនុបានឲ្យដឹងថា មុនចូលចតនៅកំពង់ផែក្រុងព្រះសីហនុ នាវាទេសចរណ៍ Wisterdem បានចេញដំណើរមកពីប្រទេសថៃ ហើយត្រៀមធ្វើដំណើរបន្តទៅកាន់ប្រទេសវៀតណាម នៅម៉ោង ៨យប់ ថ្ងៃទី២២ ខែមករា ឆ្នាំ២០១៩នេះ៕ ដោយ ៖ ដែន សីមា