ខេត្តព្រះសីហនុ៖ អភិបាលក្រុងព្រះសីហនុលោក បានអះអាងថា មន្ត្រីស្ថាប័នជំនាញកំពុងតែជម្រុញសកម្មភាព ស្ថាបនាអាងស្តុកចម្រោះទឹកស្អុយចំនួន ៤កន្លែង ឲ្យរួចរាល់នៅមុនពិធីបុណ្យចូលឆ្នាំប្រពៃណីខ្មែរឆ្នាំ២០១៩នេះ ដើម្បីចម្រោះទឹកស្អុយ ឬទឹកកខ្វក់ឲ្យមានអនាម័យជាមុនសិន ទើបបង្ហូរទឹក ដែលចម្រោះរួចនោះចូលទៅក្នុងសមុទ្រ។
អភិបាលក្រុងព្រះសីហនុ លោក អ៊ី សុខឡេង នាឱកាសចុះពិនិត្យការដ្ឋានសាងសង់អាងស្តុកចម្រោះទឹកស្អុយទាំង ៤កន្លែង ដែលរដ្ឋបាលខេត្តនេះ កំពុងសាងសង់ កាលពីព្រឹកថ្ងៃទី២២ ខែមករា ឆ្នាំ២០១៩ បានផ្តល់សម្ភាសឲ្តអ្នកកាសែតដឹងថា អាងស្តុកចម្រោះទឹកស្អុយទាំ ៤កន្លែងនៅក្រុងព្រះសីហនុ នឹងសាងសង់រួចរាល់នៅមុនបុណ្យចូលឆ្នាំខ្មែរខាងមុខនេះ។
លោក អ៊ី សុខឡេង បន្តថា អាងស្តុកចម្រោះទឹកស្អុយខាងលើនេះ ស្ថាបនាឡើង ដើម្បីស្តុបទឹកស្អុយមិនអោយហូចូលសមុទ្រ ក្រោមការយកចិត្តទុកដាក់ពីគណៈកម្មាធិការជាតិគ្រប់គ្រងតំបន់ឆ្នេរ រួមមាន៖ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់- ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន។
លោក អ៊ី សុខឡេង ឲ្យដឹងដូច្នេះ រួចបញ្ជាក់ថា ចំពោះការងារថែរក្សាអនាម័យបរិស្ថានខាងលើនេះ ក៏មានការចូលរួមបន្ថែមពី ឯកឧត្តមទេសរដ្ឋមន្ត្ រីស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនផងដែរ។
លោកបន្តថា ចំពោះថវិកាសម្រាប់សាងសង់អាងស្តុកចម្រោះទឹកស្អុយនេះ ក្រៅពីថវិកា របស់រដ្ឋ ក៏ទទួលបានថវិកាជំនួយបន្ថែមពី ឯកឧត្តមឧកញ៉ា លី យ៉ុងផាត់ ឯកឧត្តមឧកញ៉ា កុក អាន ឯកឧត្តមឧកញ៉ា សុខ គង់ លោកឧកញ៉ា អ៊ូ ឆាយ និងសប្បុរសជនមួយចំនួនទៀត។
នាឱកាសនោះដែរ មន្ត្រីបច្ចេកទេសបានឲ្យដឹងថា អាងស្តុកចម្រោះទឹកស្អុយទាំង ៤កន្លែងនេះ ជាកន្លែងស្តុកទឹកស្អុយដែលហូចេញពីតំបន់នានាក្នុងក្រុងព្រះសីហនុ។ ក្នុងនោះក៏មានរៀបចំប្រពន្ធ័ធតភ្ជាប់ សម្រាប់បូមយកទឹកស្អុយ ពីអាងស្តុកចម្រោះទាំង ៤កន្លែងនេះ ទៅកាន់អាងចម្រោះទឹកស្អុយដែលមានទំហំ ១៦ហិកតា មានទីតាំងស្ថិតនៅចុងឆ្នេរអូរឈើទាល ដែលជាអាងប្រព្រឹត្តកម្មចម្រោះទឹកកខ្វក់ ក្នុងក្រុងព្រះសីហនុ ដើម្បីទប់ស្កាត់មិនឲ្យមានទឹកកខ្វក់ ហូចូលក្នុងសមុទ្រដោយមិនបានឆ្លងកាត់ អាងចម្រោះទឹកស្អុយទៀតទេ៕ ដោយ ៖ ដែន សីមា
