ខេត្តស្វាយរៀង ៖ លោក ឈុន យិ ថុង (Choon Yik Thong) អគ្គនាយកក្រុមហ៊ុន ថប ស្ព័ត ថេកស្ទាយ នៅព្រឹកថ្ងៃទី២២ ខែមករា ឆ្នាំ២០១៩នេះបានអញ្ជើញជាអធិបតីនៅក្នុងពិធីសម្ភោធ ដាក់ឱ្យប្រើប្រាស់ជាផ្លូវការនូវបណ្ណាល័យ-មណ្ឌលសិក្សានៅរោងចក្រ ថប ស្ព័ត ថេកស្តាយ ស្ថិតក្នុងតំបន់សេដ្ឋកិច្ចពិសេសមេនហាតធេន ក្រុងបាវិត ខេត្តស្វាយរៀង។
ពិធីនេះក៏មានការចូលរួមផងដែរពីសំណាក់ លោកនាយកសមាគមរោងចក្រកាត់ដេរនៅកម្ពុជា លោក ខេន លូ លោក កាំង ម៉ូនីកា លោក ហុក សុធី និងតំណាងតំបន់សេដ្ឋកិច្ចពិសេសមេនហាធេន រួម និងភ្ញៀវកិត្តិយសចូលរួមជាច្រើននាក់ទៀត នៅក្នុង នៅរោងចក្រ ថប ស្ព័ត ថេកស្ទាយ លីមីតធីត ក្រុងបាវិត ខេត្តស្វាយរៀង ។
នៅក្នុងឱកាសនោះលោកអគ្គនាយកក្រុមហ៊ុន ឈុន យិថុង បានអោយដឹងថា៖ ធនធានមនុស្សយើង ចាំបាច់ណាស់ត្រូវតែមានការអភិវឌ្ឍន៍ ដូចច្នេះហើយទើបគាត់សម្រេចបង្កើត បណ្ណាល័យនៅក្នុងរោងចក្រ ថបស្ព័ត នេះឡើងដើម្បីចង់អោយកម្មករកម្មការិនី និងនិយោជិកទាំងអស់ មករៀនសូត្រ បង្កើតចំណេះដឹង និងអភិវឌ្ឍន៍ខ្លួនរបស់ពួកគាត់អោយមានភាពរីកចម្រើន ។
លោកអគ្គនាយកក្រុមហ៊ុន បានមានប្រសាសន៍បន្តថា ៖ ទោះបីជាយ៉ាងណាក៏ដោយក៏លោកនឹង លើកទឹកចិត្តអោយកម្មករកម្មការិនី និងនិយោជិកទាំងអស់ ត្រូវតែចូលរួមសិក្សាស្រាវជ្រាវនូវចំណេះដឹងផ្សេងៗពីបណ្ណាល័យនេះ ដើម្បីបង្កើតសមត្ថភាព និងចំណេះដឹងរបស់ខ្លួន អោយមានភាពរីកចំរើន បន្ថែមទៀត។
លោក ហុក សុធី ប្រធានអង្គការស៊ីហ្វា បានអោយដឹងថា៖ មូលហេតុដែលយើងបង្កើតបណ្ណាល័យ នៅក្នុងរោងចក្រ នេះឡើងពីព្រោះយើងមើលឃើញហើយថានៅរោងចក្រ មានមនុស្សច្រើនណាស់ ហើយពួកគាត់សុទ្ធតែមកពីតាមស្រុកស្រែជនបទឆ្ងាយៗ ជាពិសេសពួកគាត់មិនសូវមានចំណេះដឹងជ្រៅជ្រះ ទើបយើងសម្រេចបង្កើតបណ្ណាល័យ-មណ្ឌលសិក្សា នៅទីនេះដើម្បីអោយពួកគាត់ បានចូលមើលចូលអាន និងសិក្សាស្រាវជ្រាវបង្កើតសមត្ថភាព និងចំណេះដឹងរបស់ពួកគាត់ ។
លោក ហុក សុធី បានបន្តទៀតថា ៖ ការបង្កើតបណ្ណាល័យ-មណ្ឌលសិក្សា នៅតាមរោងចក្រនេះបង្កើតបានចំនួន១៩កន្លែងមកហើយ នៅក្នុងរយៈពេល១៣ឆ្នាំកន្លងមកនេះ។ហើយលោកក៏បានសំណូមពរអោយមានការបង្កើតបណ្ណាល័យ-មណ្ឌលសិក្សា នៅតាមរោងចក្រដទៃៗទៀត ឱ្យបានច្រើនដើម្បីអោយកម្មករកម្មការិនី និងនិយោជិកទាំងអស់បានបង្កើនសមត្ថភាព និងចំណេះដឹង អោយមានភាពរីកចំរើន និងការអភិវឌ្ឍន៍ខ្លួនរបស់ពួកគាត់ទៅថ្ងៃខាងមុខផងដែរ ៕ ដោយ ៖ វ៉ៃគោ
