កោះកុង ៖ រដ្ឋបាលខេត្តកោះកុង បានចេញសេចក្តីប្រកាសដល់បុគ្គលណាដែលពាក់ព័ន្ធ នឹងការទន្ទ្រានដីព្រៃ របស់រដ្ឋយកធ្វើ កម្មសិទ្ធិរបស់ខ្លួន ចាំបាច់ដកខ្លួនចេញពីបន្ទាន់ ហើយប្រគល់ដីដែលបានកាប់ទន្ទ្រានជូនរដ្ឋវិញ។ បើមិនដូច្នេះទេ ក្នុងនាមជាអាជ្ញាធរ នឹងរៀបចំពាក្យបណ្តឹងទៅតុលាការ។
ពលរដ្ឋជាច្រើនកំពុងរង់ចាំមើលថាតើ សេចក្តីជូនដំណឹងរបស់រដ្ឋបាលខេត្តកោះកុង អាចនឹងមានប្រសិទ្ធភាពចំពោះមន្ត្រីមួយចំនួនដែលមានលុយ និងអំណាចដែរឬយ៉ាងណា ព្រោះកន្លងមកសម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជាបានដាក់បទបញ្ជាយ៉ាងម៉ឺងម៉ាត់ ចំពោះអាជ្ញាធរមានសមត្ថកិច្ច និងមន្ត្រីជំនាញថា ត្រូវនាំគ្នាខិតខំទប់ស្កាត់នូវរាល់ការកាប់ទន្ទ្រានដីព្រៃលិចទឹក ព្រៃកោងកាង រួមទាំងការចាក់លុបដីចំណីអូ ព្រែក សមុទ្រជាដើម តែសកម្មភាពល្មើសទាំងនេះនៅតែកើតមានជាបន្តបន្ទាប់នៅលើទឹកដីនៃខេត្តកោះកុង ឥតស្រាកស្រាន្តបន្តិចសោះ ហេតុនេះយើងទាំងអស់គ្នារងចាំមើលថាតើបន្ទាប់ពីរដ្ឋបាលខេត្តកោះកុង បានចេញលិខិតជូនដំណឹងមួយច្បាប់នេះរួចវាអាចនិងមានការបញ្ឈប់នូវសកម្មភាពល្មើសច្បាប់នៃការទន្ទ្រានយកដីរដ្ឋទៀតដែរឬយ៉ាងណា ?
នេះពុំមែនជាលើកទី១ទេ ដែលអាជ្ញាធរខេត្តកោះកុង ប្រកាសជូនដំណឹងដល់ប្រជាពលរដ្ឋទាំងអស់បានដឹងជាព័ត៌មាន ខណៈបច្ចុប្បន្នមានសកម្មភាពជនខិលខូចមួយចំនួន បានចូលរុករានកាប់ឆ្ការយកដីព្រៃធ្វើជាកម្មសិទ្ធិរបស់ឯកជនលក់ អោយឈ្មួញជាហូរហែរ។
តាមលិខិតជូនដំណឹងរបស់រដ្ឋបាលខេត្តកោះកុង កាលពីថ្ងៃទី១៥ ខែមករា ឆ្នាំ២០១៩ ដែលទទួលបាន បានបញ្ជាក់ថា រដ្ឋបាលខេត្ត ស្នើឱ្យបុគ្គលជាប់ពាក់ព័ន្ធ មេត្តាដកខ្លួនចេញពីការទន្ទ្រានយកដីរដ្ឋ ហើយត្រូវប្រគល់ដីដែលកាន់កាប់ជូនរដ្ឋវិញ។ បើមិនដូច្នេះទេ ក្នុងនាមអាជ្ញាធររដ្ឋ នឹងដាក់ពាក្យបណ្តឹងទៅតុលាការ ដើម្បីចាត់ការតាមច្បាប់។
លោក សុខ សុទ្ធី អ្នកនាំពាក្យសាលាខេត្តកោះកុង បានពន្យល់បន្ថែមនៅថ្ងៃទី២២ ខែមករា នេះថា សកម្មភាពចុះកាប់រុករានដីព្រៃលិចទឹក ដីព្រែកធម្មជាតិ ឬតំបន់ឧទ្យានការពារអភិរក្ស កំពុងបានកើតមានឡើងគួរឱ្យព្រួយបារម្ភ ក្រោមពាក្យបំផុស បំផុលរបស់ក្រុមឈ្មួញថា ដីមានឯកសារកាន់កាប់ត្រឹមត្រូវ ឬហាងឆេងដីលក់បានថ្លៃនៅតាមបណ្តាស្រុកក្នុងដែនដីខេត្តកោះកុង នាពេលបច្ចុប្បន្ន។
បើតាមការពិនិត្យស្រាវជ្រាវរបស់អ្នកនាំពាក្យខេត្ត ទីតាំងរងការកាប់ទន្ទ្រានយកដីច្រើនជាងគេ គឺនៅស្រុកបុទុមសាគរ និងស្រុកគិរីសាគរ ជាដើម។ ហើយអាជ្ញាធរខេត្ត និងសមត្ថកិច្ចមន្ទីរជំនាញ តែងមានវិធានការចុះទប់ស្កាត់ និងបង្ក្រាបជាញឹកញាប់ផងដែរ។
ទាក់ទិននឹងបទល្មើសកាប់ឆ្ការរុករានយកដីរដ្ឋធ្វើជាកម្មសិទ្ធទិញលក់នេះដែរ កន្លងទៅ មានប្រជាពលរដ្ឋជាច្រើន បាននាំគ្នាផ្តល់ព័ត៌មានជាបន្តបន្ទាប់មកអ្នកសារព័ត៌មាន និងអាជ្ញាធរខេត្ត អោយជួយវិធានការបង្ក្រាបឱ្យទាន់ពេលវេលា ជៀសវាងកកើតមានភាពអនាធិបតេយ្យគ្មានច្បាប់ទម្លាប់ត្រឹមត្រូវ។ ម្យ៉ាងទៀត កាន់តែបង្កដីព្រៃឈើរងផលបាត់បង់ទៅៗ ៕ ដោយ ៖ ស្រីនាថ