កោះបាលីរបស់ឥណ្ឌូនេស៊ី ដែលជាកោះមួយដ៏ស្រស់ស្អាតក្នុងពិភពលោក កំពុងពិចារណាយកពន្ធអ្នកទេសចរដែលបានមកលេង ដើម្បីអភិរក្សបរិស្ថាន។
សម្រស់ដ៏ស្រស់ស្អាត និងទាក់ទាញរបស់វា បានធ្វើឲ្យកោះបាលីប្រឈមនឹងបញ្ហាយ៉ាងខ្លាំង ដោយសារតែចំនួនទេសចរមកលេងយ៉ាងច្រើនពីមួយឆ្នាំទៅមួយឆ្នាំ។
បើតាមទិន្នន័យរបស់រដ្ឋាភិបាលឥណ្ឌូនេស៊ី កោះបាលីទាក់ទាញភ្ញៀវទេសចរឲ្យមកលេងចំនួន ៥,៧លាននាក់ក្នុងឆ្នាំ ២០១៧។ ទិន្នន័យភ្ញៀវទេសចរសម្រាប់ឆ្នាំ ២០១៨ មិនទាន់ចេញនៅឡើយទេ ប៉ុន្តែតួលេខអ្នកមកលេងត្រូវបានគេជឿជាក់ថា អាចកើតឡើងជាងមុន។
ដោយសារតែចំនួនភ្ញៀវចរដ៏ច្រើនមកលេងជារៀងរាល់ឆ្នាំ កោះបាលីប្រឈមនឹងបញ្ហាបរិស្ថានយ៉ាងខ្លាំង ព្រោះអ្នកទេសចរទាំងអស់បានបន្សល់ទុកនូវសំរាម រួមមានប្លាស្លិកជាដើម នៅតាមឆ្នេរ។
ខណៈ ទេសចរណ៍បានផ្តល់ថវិការយ៉ាងច្រើនដល់សហគមន៍ វាក៏អាចធ្វើឲ្យប៉ះពាល់អនាម័យនៅតំបន់នោះដែរ និងធ្វើឲ្យមានការសឹក និងបំផ្លាញបរិស្ថាន។
បើតាមសេចក្តីរាយការណ៍របស់កាសែត Jakarta Post បានឲ្យដឹងថា រដ្ឋាភិបាលប្រចាំកោះបាលី បានពង្រាងច្បាប់មួយដើម្បីយកពន្ធចំនួន ១០ដុល្លាទៅលើអ្នកទេសចរម្នាក់ក្រោយពេលពួកគេចាកចេញពីប្រទេស។
“អ្នកទេសចរមកកំសាន្តជាមួយនឹងបរិស្ថាន និងវប្បធ៌មរបស់យើង ហេតុអ្វីមិនចូលរួមអភិរក្សវា?” នេះបើតាមការបញ្ជាក់របស់លោក I Nyoman Adi Wiryatama ដែលជាប្រធានសភា នៃកោះបាលី។
មុនពេលបង្កើតច្បាប់ដើម្បីយកពន្ធ សាលាផ្នែកទេសចរណ៍ និងបដិសណ្ឋារកិច្ច នៃសកលវិទ្យាល័យ Udayana University នៅបាលី បានរៀបចំការសិក្សាមួយ ដែលធ្វើប្រជាមតិលើអ្នកទេសចរអន្តរជាតិដោយសាកសួរ ថាតើពួកគេមានឆន្ទៈបរិច្ចាកលុយដើម្បីចំណាយលើការអភិរក្សកោះឬទេ។ ក្នុងនោះមានចំនួន ៦០ភាគរយ ឆ្លើយថា មានឆន្ទៈ។
សូមបញ្ជាក់ថា ឥណ្ឌូនេស៊ី មិនមែនជាប្រទេសតែមួយដែលគ្រោងយកពន្ធលើអ្នកទេសចរនោះទេ។
ប្រទេសជប៉ុនកាលពីពេលថ្មីៗនេះ បានធ្វើការបោះឆ្នោតដើម្បីយកពន្ធលើអ្នកទេសចរផងដែរ ក្រោយពេលពួកគេចាកចេញ។ ពន្ធនោះគឺចំនួន ៩ដុល្លាក្នុងមួយនាក់ ដែលគេនឹងត្រូវប្រើប្រាស់លើការសាងសង់អាគារ និងថែរក្សារចនាសម្ព័ន្ធទេសចរណ៍៕ សុភ័ក្ត្រ
ប្រភព៖ CNN