ខេត្តព្រះសីហនុ៖ សមត្ថកិច្ចអធិការដ្ឋាននគរបាលស្រុកព្រៃនប់ បានឱ្យដឹងថា ព្រឹកថ្ងៃទី២៣ ខែមករា ឆ្នាំ២០១៩នេះ វេលម៉ោង ៤ និង៤០នាទី មានគ្រោះថ្នាក់ចរាចរមួយករណីកើតឡើង បណ្តាលឲ្យមានមនុស្សចំនួន ៦នាក់បានរងរបួសធ្ងន់ស្រាល។
សមត្ថកិច្ចនគរបាលស្រុកព្រៃនប់ បានឱ្យដឹងបន្តថា គ្រោះថ្នាក់ចរាចរណ៍ខាងលើនេះ កើតឡើងតាមកំណាត់ផ្លូវតិលេខ៤ ស្ថិតក្នុងស្រុកព្រៃនប់ រវាងរថយន្ត១គ្រឿង ម៉ាក KING LONG បើកបរដោយឈ្មោះ ស្រ៊ុន ឡុងហេង ភេទប្រុស មានទីលំនៅក្រុង~ខេត្តព្រះសីហនុ និង មានអ្នករួមដំណើរចំនួន៥អ្នក។
សមត្ថកិច្ចបន្តទៀតថា លុះមកដល់ចំណុចខាងលើ ក៏បានប៉ះជាមួយរថយន្ត ១គ្រឿង មិនស្គាល់ភិនភាគ និងអ្នកបើកបរមានទិសដៅបញ្ច្រាស់គ្នានៅតាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ ១៧៥~១៧៦ ស្ថិតក្នុងភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ។
គ្រោះថ្នាក់ចរាចរណ៍ខាងលើនេះ បណ្ដាលឲ្យមនុស្សរងរបួសសរុបចំនួន៦នាក់ រួមមាន ៖
១. ឈ្មោះ ស្រ៊ុន ឡុងហេង អ្នកបើកបររថយន្ត KING LONG រងរបួសធ្ងន់ ។
២. ឈ្មោះ ទូ ហ៊ូទុង ភេទប្រុស អាយុ៣៧ឆ្នាំ (ជនជាតិចិន) មានទីលំនៅ ក្រុងព្រះសីហនុ រងរបួសស្រាល ។
៣. ឈ្មោះ ហ៊ិន ស្រីពេជ្រ ភេទស្រី អាយុ២៩ឆ្នាំ មានទីលំនៅភូមិ៤ សង្គាត់៤ ក្រុងព្រះសីហនុ របួសស្រាល ។
៤. ឈ្មោះ ហង្ស ចាន់ចំរើន ភេទស្រី អាយុ២៥ឆ្នាំ មានទីភូមិចុងអូរ ឃុំសំរុង ស្រុកព្រៃនប់ ខេត្តព្រះសីហនុ ។
៥. សាំង សារឿន ភេទស្រី អាយុ២៩ឆ្នាំ មានទីភូមិចុងអូរ ឃុំសំរុង ស្រុកព្រៃនប់ ខេត្តព្រះសីហនុ ។
៦. អ្នករួមដំណើរម្នាក់ទៀត មិនស្គាល់អត្តសញ្ញាណ បានរងរបួសធ្ងន់ ។
សមត្ថកិច្ចនគរបាលស្រុកព្រៃនប់ បានឱ្យដឹងថា បច្ចុប្បន្ន អ្នករងរបួស ត្រូវបានបញ្ជូន ទៅសង្គ្រោះបន្ទាន់នៅមន្ទីពេទ្យ ឯកជនសេតេ។ រីឯវត្ថុតាង ត្រូវបានកម្លាំងនគរបាលនាំយករក្សាទុក នៅអធិដ្ឋាននគរបាលស្រុកព្រៃនប់។ ប៉ុន្តែ ដោយឡែកអ្នកបើកបរ និងរថយន្តម្ខាងទៀត បានរត់គេចខ្លួនបាត់ក្រោយពេលកើតហេតុ៕ ដោយ ៖ ដែន សីមា