តាកែវ ៖ បើទោះបីជាទទួលបានលទ្ធផលរួមគ្នាល្អប្រពៃតរៀងមកក្តី ក៏ស្នងការនគរបាលខេត្តតាកែវប្រទេសកម្ពុជា និងស្នងការនគរបាលខេត្តអានយ៉ាងប្រទេសវៀតណាម នៅតែត្រូវការកិច្ចសហប្រតិ្តការល្អថែមទៀត ដើម្បីភាពសុខសាន្តរបស់ប្រជាពលរដ្ឋ លើការងារបង្ការ និងបង្ក្រាបគ្រប់រាល់បទល្មើស ដែលកើតមាននៅតាមបន្ទាត់ព្រំដែន ជាពិសេសរក្សាការពារនូវបង្គោលព្រំដែន ដែលប្រទេសទាំងពីរបានសម្រេចបោះបង្គោលរួចមកហើយ ។
ថ្លែងក្នុងកិច្ចប្រជុំជួបសំណេះសំណាល និងជូនពរក្នុងឱកាសបុណ្យចូលឆ្នាំថ្មីប្រជាជនវៀតណាម នៅស្នងការនគរបាលខេត្តអានយ៉ាង នាថ្ងៃទី ២៣ ខែមករា ឆ្នាំ២០១៩នេះ ឯកឧត្តមឧត្តម សេនីយ៏ទោ សុខ សំណាង ស្នងការនគរបាលខេត្តតាកែវ បានលើកឡើងពីចំណុចគោលជាច្រើនលើកិច្ចការបង្កើនក្នុងកិច្ចសហប្រតិបត្តិការណ៍ល្អជាមួយគ្នាថែមទៀត រវាងស្នងការនគរបាលខេត្តអានយ៉ាងដែលមានលោក ប៊ួយ ប៊ែទឿ ជាស្នងការ ដោយក្តោបសំខាន់គឺចង់អោយប្រជាជនរបស់ប្រទេសទាំងពីរ មានភាពសុខសាន្ត និងមានជិវភាពធូរធារ លើការងាររកស៊ីផ្សេងៗរបស់ពួកគាត់ ។
លោក ប៊ួយ ប៊ែទឿ ស្នងការនគរបាលខេត្តអានយ៉ាងបានមានប្រសាសន៍ថា ពេញមួយឆ្នាំមកនេះ ការងារកិច្ចសហប្រតិបត្តិការរវាងប្រទេសទាំងពីរទទួលបានលទ្ធផលបានល្អប្រសើរ ពិសេសបញ្ហាសន្តិសុខ និងសកម្មភាពរកស៊ីរបស់ប្រជាពលរដ្ឋនៃប្រទេសទាំងពីរ។ មួយវិញទៀតភាពវិជ្ជមានជាចម្បង លើការងារការពារសន្តិសុខសណ្តាប់ធ្នាប់តាមខ្សែបណ្តោយបន្ទាត់ព្រំដែន ដោយបង្ការទប់ស្កាត់បាននូវបទល្មើសជាច្រើន ដោយសមត្ថកិច្ចនៃប្រទេសទាំង២ គឺមានកិច្ចសហការគ្នាបានល្អ និងផ្តល់ព័ត៌មានបានទាន់ហេតុការណ៍ ក្នុងការបង្ក្រាបបទល្មើស ។
ក្រោយជំនួបនៃការប្រជុំ រវាងស្នងការនគរខេត្តតាកែវ និងស្នងការនគរបាលខេត្តអានយ៉ាង រួចក៏មានការជូនកាដូជូនពរក្នុងឱកាសបុណ្យចូលឆ្នាំថ្មីប្រជាជនវៀតណាមផងដែរ ៕ ដោយ ៖ តាកែវ
