ខេត្តព្រះសីហនុ ៖ មន្ត្រីជំនាញត្រួតពិនិត្យសុវត្ថិភាពចំណីអាហារ ប្រចាំខេត្តព្រះសីហនុ បានបន្តសកម្មភាព របស់ខ្លួន ចុះទៅត្រួតពិនិត្យរកសារធាតុគីមី ដែលអាចត្រូវបានអាជីវករមួយចំនួន លួចដាក់ចូលទៅក្នុងចំណីអាហារ ឬក៏អាហារវេចខ្ចប់មួយចំនួន ដែលនាំឲ្យប៉ះពាល់ដល់សុខភាពអ្នកទទួលទាន ឬអ្នកប្រើប្រាស់ធ្ងន់ធ្ងរ។
មន្ត្រីសាខាកាំកុងត្រូល ខេត្តព្រះសីហនុ នៅព្រឹកថ្ងៃពុធ ទី២៣ ខែមករា ឆ្នាំ២០១៩នេះ បានដឹកនាំក្រុមការងារជំនាញមួយក្រុម ចុះទៅនិត្យគុណភាពម្ហូបអាហារ ដែលអាជីវករដាក់លក់នៅផ្សារកងកេង ស្ថិតក្នុងឃុំរាម ស្រុកព្រៃនប់ ខេត្តព្រះសីហនុ។
សកម្មភាពនេះ មន្ត្រីជំនាញកាំកុងត្រូលខេត្តព្រះសីហនុ បានសហការពីមន្ត្រីរដ្ឋបាលខេត្តព្រះសីហនុ មន្ត្រីមន្ទីរពាណិជ្ជកម្មខេត្ត និងមន្ត្រីស្ថាប័នពាក់ពន្ធ័ មួយចំនួនទៀត ដោយក្នុងយុទ្ធនាការនេះ មន្ត្រីកាំកុងត្រូល បានរកឃើញបបែលងៀតមួយចំនួន មានផ្ទុកសារធាតុគីមីហាមឃាត់ ដែលនាំឲ្យប៉ះពាល់ដល់សុខភាពអ្នកប្រើប្រាស់ ឬអ្នកទទួលទានធ្ងន់ធ្ងរ។
នាឱកាសនោះដែរ មន្ត្រីកាំកុងត្រូលខេត្តព្រះសីហនុ ក៏បានធ្វើការណែនាំ និងធ្វើកំណត់ហេតុ ជាមួយអាជីវករនៅតាមតូបលក់ដូរមួយចំនួន ឲ្យឈប់ទទួលយកចំណីអាហារ ដែលមានលាយសារធាតុគីមីហាមឃាត់នេះ មកលក់ជាបន្តទៀត ព្រោះជាអំពើខុសច្បាប់ និងអាចមានទោស ប្រសិនបើនៅបន្តទទួលយកចំណីអាហារមានលាយសារធាតុគីមីមកដាក់លក់ជាបន្តទៀតនៅថ្ងៃខាងមុខ។
មន្ត្រីកាំកុងត្រូលខេត្តព្រះសីហនុ បានឲ្យដឹងថា សម្រាប់បបៀលងៀត ដែលមន្ត្រីជំនាញបានដកហូត គឺបាននាំយកទៅទៅដុចកំទេចចោលភ្លាមៗដែរ។
មន្ត្រីកាំកុងត្រូលដែលចុះពិនិត្យផ្ទាល់ដល់ផ្សារកងកេង បានឲ្យដឹងថា ចំពោះការត្រួតពិនិត្យ និងធ្វើតេស្ត ទៅលើម្ហូបអាហារចម្រុះផ្សេងៗទៀត មានដូចជា៖ អាហារវេចខ្ចប់រួច និងអាហារសមុទ្រក្លាស្សេជាដើម ដែលអាជីវករដាក់លក់នៅផ្សារកងកេងខាងលើនេះ គឺមិនមានលាយសារធាតុគីមីហាមឃាត់ ដែលនាំឲ្យប៉ះពាល់ដល់សុខភាពប្រជាពលរដ្ឋ ឬអ្នកទទួលទាននោះទេ ក្រៅពីរកឃើញសារធាតុគីមី នៅក្នុងបបែលងៀតមួយចំនួននោះ៕ ដោយ ៖ ដែន សីមា
