មេដឹកនាំកូរ៉េខាងជើង គីម ជុងអ៊ុន បានសម្តែងការពេញចិត្តយ៉ាងខ្លាំង ក្រោយពេលទទួលបានលិខិតមួយច្បាប់ពីប្រធានាធិបតីអាមេរិច ដូណាល់ ត្រាំ សម្រាប់កិច្ចប្រជុំកំពូលលើកទី ២។
គីម ជុងអ៊ុន បានថ្លែងបែបនោះ ក្រោយពេលជួបពិភាក្សាជាមួយនឹងជំនួយការរបស់លោកម្នាក់ ដែលបានធ្វើដំណើរមកកាន់ទីក្រុងវ៉ាស៊ីនតោន កាលពីសប្តាហ៍មុន។
មេដឹកនាំអាមេរិច និងកូរ៉េខាងជើង គ្រោងនឹងធ្វើជំនួបកំពូលលើកទី ២របស់ពួកគេ នៅចុងខែកុម្ភៈខាងមុខនេះ។ នេះបើតាមការបញ្ជាក់របស់សេតវិមានអាមេរិច។
កាលពីសប្តាហ៍មុន គីម ជុងអ៊ុន បានធ្វើដំណើរទស្សនៈកិច្ចទៅកាន់ប្រទេសចិន ដើម្បីជួបពិភាក្សាជាមួយនឹងប្រធានាធិបតីចិន ស៊ី ជិនពីង ដូចដែលលោកធ្លាប់ធ្វើមុនពេល កិច្ចប្រជុំកំពូលលើកទី ១នៅសិង្ហបុរី ខណៈអ្នកចរចារជាន់ខ្ពស់កូរ៉េខាងជើង Kim yong-chol បានទៅជួបប្រធានាធិបតីអាមេរិច ដូណាល់ ត្រាំ នៅសេតវិមាន។
បើតាមប្រព័ន្ធផ្សព្វផ្សាយរបស់កូរ៉េខាងជើង KCNA បានឲ្យដឹងថា លោក គីម ជុងអ៊ុន បាននិយាយថា “ពួកយើងនឹងជឿជាក់លើការគិតវិជ្ជមានរបស់ប្រធានាធិបតី ត្រាំ រងចាំដោយអត់ធ្មត់ និងស្មោះត្រង់ជាមួយអាមេរិច និងធ្វើឲ្យមានការរីកចម្រើនម្តងមួយជំហានៗ ឆ្ពោះទៅកាន់គោលដៅ”។
សូមបញ្ជាក់ថា កាលពីពេលថ្មីៗនេះ មេដឹកនាំកូរ៉េខាងជើង បានព្រមានថាប្រទេសរបស់ខ្លូនអាចនឹងប្តូរទិសដៅ ប្រសិនជាអាមេរិចនៅតែបន្តដាក់ទណ្ឌកម្មលើខ្លួន។
ទោះយ៉ាងណា ស្ថានភាពបានត្រឡប់មកជាធូរស្រាលវិញ បន្ទាប់ពីមេដឹកនាំកូរ៉េខាងជើង បានសម្តែងការពេញចិត្តចំពោះលិខិតរបស់ត្រាំ៕ សុភ័ក្ត្រ
ប្រភពៈ BBC