ការវាយប្រហារតាមដែនអាកាស ដោយកងកំលាំងរដ្ឋាភិបាលចំរុះដឹកនាំដោយអាមេរិច បានសម្លាប់ជនស៊ីវិលចំនួន ២៣នាក់ នៅថ្ងៃពុធម្សិលមិញនេះ នៅក្នុងភូមិមួយដែលកាន់កាប់ដោយក្រុមរដ្ឋអ៊ីស្លាមក្នុងខេត្ត Deir Ezzor ប្រទេសស៊ីរី។ នេះបើតាមការបញ្ជាក់របស់ក្រុមសង្កេតការ។
ការិយាល័ឃ្លាំមើលសិទ្ធិមនុស្សស៊ីរី ដែលមានមូលដ្ឋានក្នុងប្រទេសអង់គ្លេសបាននិយាយថា “យ៉ាងហោចណាស់ជនស៊ីវិលចំនួន ២៣នាក់ ដែលមានកុមារ ៨នាក់ និងស្ត្រី ៥នាក់ ត្រូវបានសម្លាប់ជិតទៀបភ្លឺនៅក្នុងការវាយប្រហារតាមដែនអាកាសដោយកងកំលាំងចំរុះដឹកនាំដោយអាមេរិច។ ការវាយប្រហារសំដៅលើភូមិមួយដែលគ្រប់គ្រងដោយក្រុម IS នៅច្រាំទន្លេ Euphrates”។
ក្រុមសង្កេតការណ៏ដដែលធ្វើរបាយការណ៏តាមសាក្សី បាននិយាយថា ជនស៊ីវិលទាំងអស់បានកំពុងលាក់ខ្លួននៅក្នុងផ្ទះមួយខ្នង ហើយពួកគេគឺជាសមាជិកនៃគ្រួសារតែមួយ។
កងកំលាំងដែលដឹកនាំដោយអាមេរិច បច្ចុប្បន្នកំពុងតែប្រយុទ្ធតតាំង ដើម្បីដណ្តើមតំបន់តូចៗដែលគ្រប់គ្រងដោយក្រុម IS។
អ្នកនាំពាក្យយោធាអាមេរិចបាននិយាយថា ការវាយតម្លៃលំអិតនៃការចោទប្រកាន់ពីការស្លាប់ជនស៊ីវិល នឹងត្រូវធ្វើឡើង ប៉ុន្តែលោកនិយាយថា កងកំលាំងចំរុះវាយប្រហារតែនៅលើគោលដៅរបស់ក្រុមសកម្មប្រយុទ្ធប៉ុណ្ណោះ៕ សុភ័ក្ត្រ
