ខេត្តស្ទឹងត្រែង ៖ កម្លាំងនគរបាលខេត្តស្ទឹងត្រែង បានចុះទៅណែនាំអ្នកយកព័ត៌មានចំនួន7 នាក់ ដែលមិនគោរពវិជ្ជាជីវៈរបស់ខ្លួន ចតរថយន្តនៅតាមដងផ្លូវធ្វើឲ្យបាត់បង់សណ្ដាប់ធ្នាប់ និងបានធ្វើការអប់រំនិងណែនាំជាលើកទី 1 ហើយ បើសិនអ្នកកាសែត មិនគោរពតាមវិជ្ជាជីវៈនោះទេ លើកទី 2 នោះទេ សមត្ថកិច្ច និងចាត់វិធានការច្បាប់។
ស្ថិតក្រោមការបញ្ជាផ្ទាល់ពី លោក ម៉ុម សារឿនអភិបាលខេត្តស្ទឹងត្រែង ទៅកាន់ស្នងការដ្ឋាននគរបាលខេត្ត និងដឹកនាំដោយលោកវរសេនីយ៍ឯក វ៉ា សុផាន់ នាយការិយាល័យផែនប្រឆាំងបទល្មើស ដឹកនាំកម្លាំង ចុះប្រតិបត្តិការនៅតាមដងផ្លូវជាតិលេខ 7 និងផ្លូវជាតិលេខ 78 ត្រង់ចំណុចអូរពងមាន់ចុះធ្វើការអប់រំណែនាំ ដល់ក្រុមអ្នកយកព័ត៌មាន ចំនួន៧ដែលមិនបានគោរពវិជ្ជាជីវៈ ចតឡានតាមដងផ្លូវ ធ្វើឲ្យបាត់បង់សណ្ដាប់ធ្នាប់ តាមផ្លូវសាធារណៈក្នុងខេត្ត។
ប្រតិបត្តិការនេះ បានធ្វើឡើងនៅយប់ថ្ងៃទី 24 ខែមករាឆ្នាំ 2019 តាមដងផ្លូវជាតិលេខ 78 និងផ្លូវជាតិលេខ 7 ចំណុចអូរពងមាន់ស្ថិតក្នុងភូមិរាជានុកូលសង្កាត់ ក្រុង ខេត្តស្ទឹងត្រែង។
លោកវរសេនីយ៍ឯកវ៉ា សុផាន់ នាយការិយាល័យប្រឆាំងបទល្មើស បានឲ្យដឹងថា ដោយឃើញថាភាពអនាធិបតេយ្យនៅតាមដងផ្លូវសាធារណៈ ក្នុងខេត្តមានរថយន្តអ្នកកាសែតមួយចំនួនដែលមិនបានគោរព ទៅតាមវិជ្ជាជីវៈ ចតឡាននៅតាមដងផ្លូវយប់ៗជាច្រើនគ្រឿង រង់ចាំដេញរថយន្តអ្នកដំណើរ ដែលសង្ស័យថាដឹកបទល្មើសដែលធ្វើឲ្យប៉ះពាល់ដល់អ្នកធ្វើដំណើរឆ្លងកាត់ទីនេះយ៉ាងខ្លាំង។
លោកវរសេនីយ៍ឯក បានបន្តឲ្យដឹងទៀតថា អ្នកកាសែតត្រូវគោរពវិជ្ជាជីវៈ អ្នកដែលចូលមកយកព័ត៌មាន ក្នុងខេត្តត្រូវតែយកប័ណ្ណព័ត៌មាន ចុះបញ្ជីនៅក្នុងមន្ទីរព័ត៌មាន ឲ្យបានដឹងថា ចុះមកយកព័ត៌មាន នៅក្នុងខេត្តដើម្បីងាយស្រួល ក្នុងការគ្រប់គ្រង ចុះយកព័ត៌មាន ក្នុងខេត្តក្នុងការអភិវឌ្ឍ និងការរីកចម្រើនរបស់រាជរដ្ឋាភិបាល និងយកព័ត៌មាន កែតម្រូវស្ថាបនា នៅចំណុចខ្វះខាតណាមួយ ដែលត្រូវធ្វើការផ្សព្វផ្សាយ ដើម្បីអោយរីកចម្រើន មិនមែនចុះមកយកព័ត៌មាន ចតឡាននៅតាមដងផ្លូវចាំតែដេញរថយន្តនោះទេ។
លោកនាយការិយាល័យបន្តថា “លោកមិនហាមឃាត់ក្នុងការយកព័ត៌មាននោះទេ តែព័ត៌មានដែលត្រូវយកនោះ គឺអ្វីដែលមានហេតុការណ៍កើតឡើងត្រូវតែចុះទៅយកព័ត៌មាន មិនមែនគ្មានហេតុការណ៍ហើយនាំគ្នា ចតឡានតាមដងផ្លូវសាធារណៈរង់ចាំយកព័ត៌មានទេ តែបើធ្វើបែបនេះ ធ្វើឲ្យប៉ះពាល់ដល់សណ្ដាប់ធ្នាប់សាធារណ:ជាខ្លាំង”។
លោកថា នៅយប់ថ្ងៃទី 24 នេះកម្លាំងរបស់លោក បានចុះទៅណែនាំអ្នកយកព័ត៌មានចំនួន7 នាក់ ដែលមិនគោរពវិជ្ជាជីវៈរបស់ខ្លួន ចតរថយន្តនៅតាមដងផ្លូវធ្វើឲ្យបាត់បង់សណ្ដាប់ធ្នាប់ នៅចំណុចអូរពងមាន់ ចំណុចគីឡូម៉ែត្រ 8 និងបានធ្វើការអប់រំនិងណែនាំជាលើកទី 1 ហើយលោកបានទទួលបញ្ជា ពីលោកច្រឹងខ្មៅ ព្រះរាជអាជ្ញាអមសាលាដំបូងខេត្តស្ទឹងត្រែងរួចហើយ បើសិនអ្នកកាសែត មិនគោរពតាមវិជ្ជាជីវៈនោះទេ លើកទី 2 នោះទេ សមត្ថកិច្ច និងចាត់វិធានការច្បាប់ជាធរមាន៕ ដោយ ៖ រចនា