ខេត្តព្រះសីហនុ ៖ អតីតមន្ត្រីគណបក្សសង្គ្រោះជាតិ លោក ឆាយ រ័ត្ន និងលោក ទេព សុផា មន្ត្រីសិទ្ធិការងារ នៃសម្ព័ន្ធសហជីព ស៊ីខៅឌូ (C.CAWDU) ត្រូវបានព្រះរាជអាជ្ញាសាលាដំបូងខេត្តព្រះសីហនុ សម្រេចចេញដីកាឃុំខ្លួន ដាក់ពន្ធនាគារជាបណ្តោះអាសន្ន នៅល្ងាចថ្ងៃពុធ ទី ២៣ ខែមករាម្សិលមិញនេះ ដោយចោទពីបទរារាំងសកម្មភាពការងារ របស់អាជ្ញាធរ និងចូលទៅកាប់រានដីព្រៃរដ្ឋហាមឃាត់ សម្រាប់ប្រភពទឹកស្អាតក្បាលឆាយ។
ការឃុំខ្លួននេះ ក្រុមអ្នកឃ្លាំមើលផែនការអភិវឌ្ឍសង្គម ចាត់ទុកថាជារឿងអយុត្តិធ៌ម និងគួររកដំណោះស្រាយដោយសន្តិវិធីជាជាងយកប្រព័ន្ធតុលាការ ដើម្បីគំរាមកំហែងពលរដ្ឋ មិនឲ្យតវ៉ាលើវិវាទដីធ្លី ដែលបានកំរើកជា ថ្មីទៀតខេត្តព្រះសីហនុ ស្របពេលតម្លៃដីកើនខ្ពស់។
អ្នកសម្របសម្រួលសមាគមអាដហុក ប្រចាំខេត្តព្រះសីហនុ អ្នកស្រី ជាប សុធារី មានប្រសាសន៍ថា ព្រះរាជអាជ្ញាសាលាដំបូងខេត្តព្រះសីហនុ គឺលោក ហួត វិចិត្រ បានសម្រេចចេញដីកាឃុំខ្លួន អតីតមន្ត្រីគណបក្ស សង្គ្រោះជាតិ លោក ឆាយ រ័ត្ន និងលោក ទេព សុផា មន្ត្រីសិទ្ធិការងារ នៃសម្ព័ន្ធសហជីព ស៊ីខៅឌូ (C.CAWDU) ដាក់ពន្ធនាគារជាបណ្តោះអាសន្ន តាមច្បាប់ស្តីពីតំបន់ការពារធម្មជាតិ មាត្រា ៦០ និងមាត្រា ៦១។
អ្នកស្រី សុធារី ដែលតាមឃ្លាំមើលសវនាការពេញមួយថ្ងៃ កាលពីថ្ងៃពុធ ទី២៣ ខែមករាម្សិលមិញនេះ ថ្លែងចាត់ទុក ការសម្រេចឃុំខ្លួនលោក ឆាយ រ័ត្ន និងលោក ទេព សុផា ក្នុងសំណុំរឿងព្រហទណ្ឌលេខ៩៦ ចុះថ្ងៃទី២៣ ខែមករា ឆ្នាំ២០១៩ ដែលមានលោកជាព្រះរាជអាជ្ញា ហ៊ួត វិចិត្រ ជាអ្នកកាន់សំណុំរឿងនេះ និងលោក ឃួន ចន្ថា ជាចៅក្រមស៊ើបសួរ ថាមិនគួរឈានដល់ឃុំខ្លួនអ្នកទាំងពីរនោះទេ។
អ្នកស្រី ជាប សុធារី ៖« ឥឡូវនេះ លោក ឆាយ រ័ត្ន និងលោក ទេព សុផា ត្រូវបានតុលាការបញ្ជូនទៅឃុំខ្លួនបណ្តោះអាសន្ន នៅពន្ធនាគារខេត្តព្រះសីហនុហើយនៅវេលាម៉ោងប្រមាណ ៦ និង៣០នាទីល្ងាចថ្ងៃទី២៣ ខែមករានេះ ។ ព្រះរាជអាជ្ញាធរបានចោទប្រកាន់លោក ឆាយ រ័ត្ន និងលោក ទេព សុផា ទៅតាមច្បាប់ស្តីពីតំបន់ការពារធនធានធម្មជាតិមាត្រា ៦០ ចំណុច ទី៩ និងមាត្រា ៦១ ចំណុចទី៧ ហើយកំរិតនៃការផ្តន្ទាទោសគឺកំរិតថ្នាក់ទី៣ » ។
កម្លាំងសមត្ថកិច្ចចម្រុះនគរបាល និងកងរាជអាវុធហត្ថខេត្តព្រះសីហនុ បានចាប់ខ្លួន លោក ឆាយ រ័ត្ន និងលោក ទេព សុផា កាលពីថ្ងៃទី២១ ខែមករា ឆ្នាំ២០១៩ នៅចំណុចតំបន់ក្បាលឆាយ ដែលអាជ្ញាធរ អះអាងថា ជាបរិវេណដីសម្រាប់អភិរក្សការពារទុកជាប្រភពទឹកស្អាត ប្រើប្រាស់នៅទូទាំងខេត្តព្រះសីហនុ មានទីតាំងនៅក្រុមទី១៨ ភូមិ១ សង្កាត់១ ក្រុង-ខេត្តព្រះសីហនុ។
ក្រោយចាប់ខ្លួនកម្លាំងនគរបាលខេត្តព្រះសីហនុ ក៏បានកសាងសំណុំរឿង បញ្ជូនអ្នកទាំងពីរនាក់ ទៅកាន់សាលាដំបូងខេត្តព្រះសីហនុ ដើម្បីបន្តនីតិវិធី កាលពីព្រឹកថ្ងៃពុធ ទី២៣ ខែមករា ហើយត្រូវបានព្រះរាជអាជ្ញាសម្រេចចេញដីកាឃុំខ្លួន ដាក់ពន្ធនាគារបណ្តោះអាសន្ននៅល្ងាចថ្ងៃដដែលនេះ។
មុនពេលបញ្ជូនទៅកាន់ពន្ធនាគារ លោក ឆាយ រ័ត្ន ថ្លែងចាត់ទុកសមត្ថកិច្ច ចាប់ខ្លួនលោក ដោយកម្លាំងចម្រុះដឹកនាំដោយលោក ស្រ៊ុន ស្រ៊ន់ អភិបាលរងខេត្តព្រះសីហនុ ថាជារឿងអយុត្តិធម៌បំផុត ដោយលោកអះអាងថា មិនបានជាប់ពាក់ព័ន្ធការតវ៉ា របស់ប្រជាពលរដ្ឋនៅតំបន់ក្បាលឆាយនោះទេ។
លោក ឆាយ រ័ត្ន ជាអតីតចៅសង្កាត់រងទី២ មកពីគណបក្សប្រឆាំង កាលពីអំឡុងឆ្នាំ២០១២ ក៏ធ្លាប់ជាប់ពន្ធនាគារម្ដងរួចមកហើយ ដោយកាលណោះត្រូវសាលាដំបូងខេត្តព្រះសីហនុ ចោទប្រកាន់ថាបានទន្ទ្រានកាន់កាប់ដីអនុក្រឹត្យរដ្ឋហាមឃាត់នៅតំបន់ក្បាលឆាយនេះដែរ។
ទាក់ទិនបញ្ហានេះ អ្នកស្រី ជាប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ មានការសោកស្តាយ ដែលព្រះរាជអាជ្ញាធរសាលាដំបូង ខេត្តព្រះសីហនុ សម្រេចឃុំខ្លួន លោក ឆាយ រ័ត្ន និងលោក ទេព សុផា ដាក់ពន្ធនាគារនៅលើសំណុំរឿងនេះទេ។ អ្នកស្រីយល់ថា អ្នកទាំងពីរ មិនមានជាប់ ពាក់ព័ន្ធ ការចូលទៅកាន់ទន្ទ្រានដីព្រៃ ឬដីបម្រុងទុកសម្រាប់ប្រភពទឹកស្អាត នៅតំបន់ក្បាលឆាយនោះទេ។
អ្នកស្រី ជាប សុធារី៖ «ពាក់ព័ន្ធករណីនេះ យើងឃើញថា វាហាក់ដូចជាអយុត្តិធ៌មសម្រាប់ពួកគាត់ដែរ ព្រោះបើនិយាយពីការចោទប្រកាន់តាមមាត្រា ៦១ ចំណុចទី៧ ស្តីពីការរារាំងក្នុងការអនុវត្តការងារ របស់សមត្ថកិច្ចនោះ គឺតាមការសាកសួរ ហើយនិងការឆ្លើយបំភ្លឺ របស់សាក្សី នៅជុំវិញទីកន្លែងកើតហេតុហ្នឹង គឺមនុស្សទាំងពីរនាក់ហ្នឹងមិនបានធ្វើការរារាំង ដល់ការអនុវត្តតួនាទី និងសមត្ថកិច្ច របស់មន្ត្រីជំនាញទាំងអស់ហ្នឹងទេ។ ពួកគាត់គ្រាន់តែចូលទៅតំបន់នោះ ក្នុងគោលបំណងហៅប្រជាពលរដ្ឋទាំងអស់ហ្នឹង ឲ្យចាកចេញពីទីកន្លែងមានបញ្ហានោះតែប៉ុណ្ណោះ។ ហើយចំពោះលោកឆាយ រ័ត្ន វិញ ក៏មិនមានគោលបំណងអ្វីទៅរារាំង កម្លាំងសមត្ថកិច្ចអ្វីដែរ ដោយគាត់គ្រាន់តែពេលឃើញ អាជ្ញាធរឃាត់ខ្លួន លោក ទេព សុផា ហ្នឹង គឺទៅក្នុងគោលបំណងទៅសាកសួរ ប៉ុន្តែនៅពេល លោក ទៅដល់ ក៏ត្រូវអាជ្ញាធរចាប់ខ្លួនគាត់ដែរ »។
មន្ត្រីឃ្លាំមើលផែនការអភិវឌ្ឍសង្គមបានឲ្យដឹងថា ទីតាំងដីមានទំនាស់ឈានដល់អាជ្ញាធរចាប់ខ្លួនលោក ឆាយ រ័ត្ន និងលោក ទេព សុផាខាងលើនេះ ឃើញមានប្រជាពលរដ្ឋប្រមាណ២០០គ្រួសារ បានចូលទៅតាំងទីលំនៅក្នុងតំបន់នោះជាច្រើនឆ្នាំមកហើយ គឺមិនមែនទើបមកកាប់រានថ្មីៗនេះទេ។
យ៉ាងនេះក្តី ថ្នាក់ដឹកនាំរដ្ឋបាលខេត្តព្រះសីហនុ បានបញ្ជាក់ថាតំបន់ដែលមានការចាប់ខ្លួនមនុស្សទាំង២នាក់នេះ គឺជាតំបន់ដីអនុក្រឹត្យ ដែលរដ្ឋបានហាមឃាត់ និងអភិរក្ស ទុកសម្រាប់ប្រភពទឹកស្អាតមានទំហំជាង ៩ហិកតា ស្ថិតនៅក្រុមទី១៨ ភូមិ១ សង្កាត់លេខ១ ក្រុងព្រះសីហនុ ដោយត្រូវការការពារឲ្យបានគង់វង្ស៕ ដោយ៖ ដែន សីមា
