បាត់ដំបង ៖ ទាហ៊ានសឹករងស្រុកសំឡូតម្នាក់ ដើរជាន់មីន បណ្ដាលឲ្យផ្ទុះរបួសកែងជើងធ្ងន់ធ្ងរ នៅប៉ុស្តិ៍សារិកា ភូមិពាមតា ឃុំតាតោក ស្រុកសំឡូត ។ ហេតុការណ៍នេះ បានកើតឡើងកាលពីថ្ងៃទី២៣ ខែមករា ឆ្នាំ២០១៩ វេលាម៉ោង ២៣៖១៥នាទី ។
បើតាមផេកហ្វេសប៊ុកផ្លូវការ លោកហេង រតនា អគ្គនាយកស៊ីម៉ាក់ បានសរសេរថា “គ្រាប់មីនប្រឆាំងមនុស្សប្រភេទ៧២អា ប្រហារជើងកងទ័ពសឹករងស្រុកសំឡូត ទាំងព្រឹក នៅថ្ងៃទី២៤ ខែមករា ឆ្នាំ២០១៩នេះ នៅភូមិសាស្ត្រនៃភូមិពាមតា ឃុំតាតោក ស្រុកសំឡូត ខេត្តបាត់ដំបង។ គ្រាប់មីន៧២A នេះ អាចបង្កឱ្យពិការក្រោមជង្គង់” ។
យោងតាមរបាយការណ៍ពី នគរបាលស្រុកស្រុកសំឡូត បានឲ្យដឹងថា ជនរងគ្រោះ ឈ្មោះ សាយ ពៅ ភេទប្រុស អាយុ ៤៥ឆ្នាំ ជាទាហ៊ានសឹករងស្រុកសំឡូត ដែលជាចំណុចឈរជើងការពារព្រំដែន ពេលដែលដូរវេនប្រចាំការ ជនរងគ្រោះបានដើរជាន់មីន បណ្ដាលឲ្យផ្ទុះរបួសកែងជើងធ្ងន់ធ្ងរ ។
ក្រោយទទួលដំណឹង សមត្ថកិច្ចបានចុះធ្វើការ ត្រួតពិនិត្យនៅកន្លែងកើតហេតុ និងបញ្ជូនជនរងគ្រោះទៅព្យាបាលនៅមន្ទីរពេទ្យ ខេត្តបាត់ដំបង៕ ដោយ ៖ កូឡាប