ខេត្តស្វាយរៀង ៖ មានការភ្ញាក់ផ្អើលទាំងព្រឹកដល់ប្រជាពលរដ្ឋក៏ដូចជាអ្នកដែលធ្វើដំណើរតាមដងផ្លូវក្នុងទីរួមស្រុកកំពង់រោទិ៍ខេត្តស្វាយរៀងខណៈពេលដែលអគ្គិសភ័យបានឆាបឆេះផ្ទះថ្មមួយខ្នងទំហំ៤ម៉ែត្រកំពស់២ជាន់តែសំណាងល្អភ្លើងពុំបានឆេះរាលដាលដល់ផ្ទះអ្នកដទៃក៏ដូចជាបង្កឱ្យមានគ្រោះថ្នាក់ដល់អាយុជីវិតមនុស្សនោះទេ ។ ហេតុការណ៏ខាងលើនេះបានកើតឡើងកាលពីវេលាម៉ោង៩ព្រឹក ថ្ងៃទី២៥ ខែមករា ឆ្នាំ២០១៩នេះ ស្ថិតនៅភូមិស្វាយអាណាតឃុំញរ ស្រុកកំពង់រោទិ៍ខេត្តស្វាយរៀង។
តាមសមត្ថកិច្ចបានឱ្យដឹងថា ៖ ផ្ទះដែលត្រូវអគ្គិសភ័យឆាបឆេះទាំងព្រឹកនោះធ្វើអំពីថ្មកំពស់២ជាន់ដែលមានម្ចាស់ឈ្មោះ ឆោម ក្រឹត ភេទ ប្រុស អាយុ ជាង៥០ឆ្នាំ មានមុខរបរជា មន្ត្រីបំរើការងារនៅសាលាស្រុកកំពង់រោទិ៍ ។
ប្រភពខាងលើបានឱ្យដឹងទៀតថាៈ ផ្ទះកើតហេតុមានដាក់លក់ទំនិញគ្រឿងកំប៉ុង គ្រឿងទេស កាហ្វេ និងហ្វូតូកូពី ។
នៅមុនពេលកើតហេតុភ្ញៀវដែលបានមកហូបកាហ្វេទទួលអារម្មណ៍ថាមានក្លិនឆ្ងៀមចម្លែកហើយក៏នាំគ្នាដើររកប្រភពនៃក្លិនរហូតបានពើបប្រទះនៅក្នុងបន្ទប់ឡាវតឿមានភ្លើងកំពុងឆាបឆេះព្រមទាំងមានផ្សែងខ្មួលខ្មាញ់ក៏នាំគ្នាទូរស័ព្ទ ហៅរថយន្តពន្លត់អគ្គិសភ័យរបស់អធិការដ្ឋាននគរបាលស្រុកកំពង់រោទិ៍ដើម្បីចេញអន្តរាគមន៍ពន្លត់ភ្លើងដែលកំពុងឆេះផ្អើលអស់អ្នកទីរួមស្រុកកំពង់រោទិ៍ទាំងព្រឹកតែម្តង។
សមត្ថកិច្ចដដែលបានបន្តទៀតថាៈ ក្រោយពីទទួលបានព័ត៍មាននេះភ្លាមក្រុមរថយន្តពន្លត់អគិ្គសភ័យក៏បានធ្វើការទំនាក់ទំនងគ្នារហូតមានរថយន្តពន្លត់អគិ្គសភ័យចំនួន៤គ្រឿងបានមកជួយពន្លត់គ្នារហូតដល់ម៉ោង១០ព្រឹកថ្ងៃដដែលអគ្គិសភ័យក៏បានរលត់ទាំងស្រុងប៉ុន្តែនៅពុំទាន់ដឹងថាអគ្គិសភ័យខាងលើបង្កឱ្យមានការខូចខាតអស់ទ្រព្យសម្បត្តិប៉ុន្មាននៅឡើយទេ ។ ហើយមូលហេតុដែលបង្កឱ្យមានគ្រោះអគ្គិសភ័យនេះសង្ស័យបណ្តាលមកពីឆ្លងចរន្តអគ្គិសនីឌុយខ្សែសាកថ្មបញ្ចូលទូរស័ព្ទសាកទុកចោលទើបបណ្តាលឱ្យឆេះបន្ទប់ឡាវតឿតែម្តង។ នេះសំណាងណាស់ប្រសិនបើពុំមានអ្នកមកហូបកាហ្វេទេច្បាស់ជាទំហ៊ំនៃការខូចខាតប្រាកដជាខ្លាំងជាងនេះជាក់ជាពុំខាន៕ ដោយ ៖ វ៉ៃគោ