ខេត្តស្វាយរៀង ៖ កម្លាំងសមត្ថកិច្ចនគរបាលការិយាល័យអន្តោប្រវេសន៍ នៃស្នងការដ្ឋាននគរបាលខេត្តស្វាយរៀង ថ្ងៃទី២៥ ខែមករាឆ្នាំ២០១៩នេះបានចាប់ឃាត់ខ្លួនជនជាតិវៀតណាមចំនួន5នាក់ ក្នុងពេលចុះត្រួតពិនិត្យរដ្ឋបាល នៅសង្កាត់ស្វាយរៀង ក្រុងស្វាយរៀង ដោយសារពួកគេបានឆ្លងដែន ចូលមកប្រកបមុខរបរលក់ឆ្នោតវៀតណាមដោយគ្មានច្បាប់អនុញ្ញាតិ។
មហាជនបានរិះគន់ថា ជនជាតិវៀតណាម បានឆ្លងដែនចូលមកលក់ឆ្នោតក្នុងទឹកដីខ្មែរ រៀងរាល់ថ្ងៃ ហើយដើរលក់ឆ្នោតវៀតណាម គ្រប់ច្រកល្ហកយ៉ាងអណាធិបតេយ្យហើយឧស្សាហ៍ឃើញសមត្ថកិច្ចចាប់ធ្វើកិច្ចសន្យា និងអប់រំណាស់ពេលអប់រំរួចក៏ដេញអោយត្រឡប់ទៅវិញ ប៉ុន្តែរូបភាពនេះបានកើតឡើងដដែលៗ ហើយជនដែលត្រូវចាប់បាន ក៏មុខដដែលៗ មិនដឹងថ្ងៃណាទើបចប់ទេ។
មហាជនបានរិះគន់ទៀតថា អ្នកលក់ឆ្នោតវៀតណាមនេះ ពួកគេជិះម៉ូតូចូលមកតាមច្រករបៀងតាមព្រំដែនមកព្រឹកល្ងាចទៅវិញរាល់ថ្ងៃ ដោយពួកគេបង់ប្រាក់ឲ្យសមត្ថកិច្ចដែលឈរជើងនៅតាមច្រករបៀងទើបចូលមកស្រួលបែបនេះ ហើយបើចង់បញ្ចប់រឿងនេះ ចង់លែងអោយមានជនជាតិវៀតណាម ចូលមកលក់ឆ្នោតនៅក្នុងស្រុកខ្មែរទៀត គឺដូចជាលំបាកជាងអូសឬស្សីបញ្ច្រាស់ចុងទៅទៀត៕ ដោយ ៖ វ៉ៃកូ
