ប្រធានាធិបតីអាមេរិច ដូណាល់ ត្រាំ បានបន្ទន់ឥរិយាបទតាមសម្ពាធនយោបាយ ដោយលោកព្រមទទួលយកដំណោះស្រាយបណ្តោះអាសន្នសិន ក្នុងការបញ្ចប់ការបិទរដ្ឋាភិបាល ដែលមានរយៈពេលវែងបំផុតក្នុងប្រវត្តិសាស្ត្រ។
ក្រោយពេលរដ្ឋាភិបាលមិនដំណើរការអស់រយៈពេល ៣៥ថ្ងៃ ពេលនេះ លោកត្រាំ បានគាំទ្រដំណោះស្រាយ ដើម្បីផ្តល់ថវិកាដល់ភ្នាក់ងារសហព័ន្ធ សម្រាប់រយៈពេល ៣សប្តាហ៍ ប៉ុន្តែកញ្ចប់ថវិកាទាំងនោះ មិនមានថវិការដែលលោកទាមទារដើម្បីចំណាយលើការសាងសង់ជញ្ជាំងព្រំដែនរវាងអាមេរិច និងមិចស៊ិចកូឡើយ។
លោក ត្រាំ ពីមុនបានប្រកាសថា គាត់នឹងធ្វើការបដិសេធរាល់កញ្ចប់ថវិការទាំងអស់ ប្រសិនជាកញ្ចប់ទាំងនោះមិនមានបញ្ជូលថវិកាចំនួន ៥,៧ពាន់លានដុល្លា ដែលលោកទាមទារសម្រាប់សាងសងជញ្ជាំងព្រំដែន។
ប៉ុន្តែបក្សប្រជាធិបតេយ្យ ដែលគ្រប់គ្រងសភា បដិសេធលើការទាមទាររបស់លោក។
កាលពីថ្ងៃសុក្រម្សិលមិញនេះ ព្រឹទ្ធសភា និងសភា បានអនុម័តច្បាប់ថវិកាជាឯកច្ឆ័ន ដើម្បីបញ្ចប់ការបិទដំណើរការរដ្ឋាភិបាលជាបណ្តោះអាសន្ន ក្រោយពេល ប្រធានាធិបតី ដូណាល់ ត្រាំ បានចុះហត្ថលេខាលើថវិការនោះឲ្យក្លាយទៅជាច្បាប់។
លោក ត្រាំ បានសរសេរក្នុងបណ្តាញសង្គមរបស់លោកថា ការសម្រេចចិត្តចុះហត្ថលេខារបស់គាត់ គឺមិនមែនជាការសម្បទាននោះទេ ប៉ុន្តែវាជាការយកចិត្តទុកដាក់លើមនុស្សរាប់លាននាក់ ដែលរងផលប៉ះពាល់ដោយការបិទរដ្ឋាភិបាល។
លោកថ្លែងនៅសេតវិមានថា លោកពិតជាមានមោទនៈភាពខ្លាំងណាស់ក្នុងការប្រកាសពីកិច្ចព្រមព្រៀង ដែលវានឹងផ្តល់ថវិកាដល់រដ្ឋាភិបាលរហូតដល់ថ្ងៃទី ១៥ ខែកុម្ភៈខាងមុខ។
លោកបញ្ជាក់ទៀតថា បុគ្គលិកសហព័ន្ធដែលរងផលប៉ះពាល់នឹងទទួកបានប្រាក់ខែពេញវិញទាំងអស់ ៕ សុភ័ក្ត្រ
ប្រភព៖ BBC