តាកែវ ៖ ថ្លែងក្នុងពិធីបិទសន្និបាតបូកសរុបលទ្ធផលការងាររបស់មន្ទីរអប់រំខេត្តតាកែវ កាលពីចុងសប្តាហ៍កន្លងទៅនេះ លោក មូល វិចិត្រ អភិបាលរងខេត្តតាកែវ បានធ្វើការសំណូមពរដល់លោកគ្រូអ្នកគ្រូ និងអ្នកពាក់ព័ន្ធនៅក្នុងវិស័យអប់រំទាំងអស់ នៅក្នុងខេត្តតាកែវ ត្រូវធ្វើយ៉ាងណា ប្រមូលផ្តុំ និងរិះរកនូវគំនិតថ្មីៗ ដើម្បីធ្វើយ៉ាងណាជួយដល់វិស័យអប់រំនៅក្នុងខេត្តតាកែវរបស់យើងអោយកាន់តែមានភាពរឹងមាំ និងខ្លាំងក្លាបន្ថែមទៀត ។
លោកអភិបាលរងខេត្តតាកែវបានបន្តថា កន្លងមកមន្ទីរអប់រំយុវជននិងកីឡាខេត្តតាកែវបានខិតខំយកចិត្តទុកដាក់អនុវត្តនូវផែនការយុទ្ធសាស្ត្រវិស័យអប់រំដែលធ្វើអោយ វិស័យអប់រំនៅក្នុងខេត្តមានការប្រែប្រួល និងរីកចម្រើនគួរអោយកត់សម្គាល់ ។ ជាមួយគ្នានេះផងដែរ មន្ទីរអប់រំក៏បានចូលរួមចំណែកក្នុងការកាត់បន្ថយនូវការចំណាយរបស់មាតាបិតា អាណាព្យាបាលរបស់សិស្ស ដោយធ្វើអោយការ ចុះឈ្មោះចូលរៀនរបស់សិស្សានុសិស្សមានការកើនឡើង ជាពិសេសចំពោះសិស្សដែលស្ថិតក្នុងស្ថានភាពគ្រួសារក្រីក្រ និងមានទីលំនៅឆ្ងាយផងដែរ ។
លោក មូល វិចិត្រ បានសង្កត់ធ្ងន់ថា ការស្តានិងអភិវឌ្ឍន៍វិស័យអប់រំ នៅក្នុងខេត្តតាកែវ ពិតជាបានឆ្លងកាត់នូវឧបសគ្គ និងការលំបាកជាច្រើនដែលទាមទារនូវការប្រមូលផ្តុំគ្នាសម្រាប់ជាកំលាំង ពីសំណាក់ដៃគូរអភិវឌ្ឍន៍ ក៏ដូចជាសហគមន៍ផ្សេងៗ ពិសេសគឺលោកគ្រូអ្នកគ្រូផ្ទាល់តែម្តង ទើបអាចជួយសម្រេចនៅកិច្ចការងារស្តា និងអភិវឌ្ឍន៍លើវិស័យអប់រំនៅក្នុងខេត្តរបស់យើងនេះបាន ។
បន្ទាប់ពីបញ្ចប់នៃការថ្លែងសន្ទរកថារួចមក នៅក្នុងពិធីបិទសន្និបាតបូកសរុបការងារអប់រំនៅក្នុងឆ្នាំ ២០១៧-២០១៨នេះដែរ ក៏មានការចែកនៅលិខិតសរសើរដល់លោកគ្រូអ្នកគ្រូដែលមានស្នាដៃ និងសាលារៀនគំរូផងដែរ ៕ តាកែវ