ខេត្តកំពង់ស្ពឺ ៖ ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា នៅថ្ងៃទី២៧ ខែមករា ឆ្នាំ២០១៩ វេលាម៉ោង ៦និង ៣០នាទី លើផ្លូវជាតិលេខ ៤ ចន្លោះគីឡូម៉ែត្រ ៣៣ -៣៤ ចំណុចភូមិធ្លក ឃុំត្រពាំងគង ស្រុកសំរោងទង បង្កឡើងដោយរថយន្ត ១គ្រឿងម៉ាកហ៊ីណូ ប្រភេទបែន ពណ៌ត្រួយចេក ពាក់ផ្លាកលេខ ចង្កូតស្តាំ PP.2630 អ្នកបើកបរមិនស្គាល់ឈ្មោះនិងទីលំនៅ(ចុះរត់គេចខ្លួនបាត់) ។
តាមការអះអាងអ្នកឃើញហេតុការរណ៍ដំបូងថា រថយន្តបែនបើកបរពីទិសខាងលិចទៅកើត លុះមកដល់ចំណុចខាងលើបានបុកជាមួយរថយន្ត ០១គ្រឿង ម៉ាកឡិចស៊ីសLexus RX330 ពណ៌ស ពាក់ស្លាកលេខ ភ្នំពេញ AJ.1339 បើកបរដោយឈ្មោះជា សុភក្រ័ ភេទប្រុស អាយុ២៦ឆ្នាំរស់នៅ ផ្ទះ១៣៥ ភូមិតាព្រហ្ម សង្កាត់ព្រែកឯង ខណ្ឌមានជ័យ រាជធានីភ្នំពេញ បើកបរបញ្ច្រាសទិសគ្នា ស្របពេលនោះមានរថយន្ត ១គ្រឿងទៀត ម៉ាកហ៊ីយ៉ាន់ដាយ(ប្រភេទបែន)ពណ៌ស ពាក់ស្លាកលេខភ្នំពេញ 3D.1489រត់ពីក្រោយរថយន្តបែន អ្នកបើកបរមិនស្គាល់ឈ្មោះ និងទីលំនៅ(ចុះរត់គេចខ្លួនបាត់) លុះមកដល់ចំណុចកើតហេតុខាងលើ បានគេចហើយក៏ផ្ទេកខ្លួនក្រឡាប់ដោយខ្លួនឯងតែម្ដង (ព្រោះបាត់ម្ចាស់ការ) បើកបរដោយល្មើសច្បាប់ចរាចរណ៍ មិនចេះអាធ្យាស្រ័យ មិនគោរពសិទ្ធិអត្ថិភាព គឺបណ្ដាលឲ្យគ្រោះថ្នាក់យ៉ាងនេះ។
ក្នុងហេតុការណ៍គ្រោះថ្នាក់ចរាចរខាងលើបណ្តាលឲ្យអ្នកបើករថយន្តឡិចចស៊ីសរងរបួសធ្ងន់និងបានបញ្ជូនទៅព្យាបាលរបួស នៅពេទ្យសម្ភពថ្នល់ទទឹង ចំណែករថយន្តខូចខាតផ្នែកខាងមុខស្ទើរទាំងស្រុង រីឯរថយន្តបែនដឹកដីទាំង ២គ្រឿង ខូចខាតដូចគ្នា បច្ចុប្បន្នមធ្យោបាយបង្ក (រថយន្តបែន) រថយន្តសរុបទាំង ៣គ្រឿងយកមករក្សាទុក នៅអធិការដ្ឋាននគរបាលស្រុកសំរោងទង បណ្ដោះអាសន្នដើម្បីកសាងសំណុំរឿង បញ្ជូនទៅជំនាញការិយាល័យចរាចរណ៍ខេត្ដ ចាត់ការតាមនីតិវិធីច្បាប់ ៕ ដោយ ៖ កូឡាប
